ISISએ 4 શિયા જવાનોને જીવતા સળગાવી દીધા
બગદાદ: આતંકી સંગઠન ISIS નિર્દયતાથી લોકોના માથા ધડથી અલગ કરવા માટે જાણીતું છે. અને હવે ફરી એક વખત એવી જ નિર્દયતાના કારણે ચર્ચામાં છે. આ વખતે ISISએ 4 શિયા જવાનોને જીવતા સળગાવી દીધા છે. એટલું જ નહીં આ બર્બતાભર્યા કૃત્યનો ISISએ વિડીયો પણ બનાવ્યો છે.
ISISની વેબસાઈટ પર અપલોડ કરવામાં આવેલો આ વિડીયો લગભગ પાંચ મિનીટનો છે. વિડીયોમાં સ્પષ્ટ નિહાળી શકાય છે કે ઓરેન્જ કલરનો જમ્પ શુટ પહેરેલા 4 શિયા જવાનોના હાથ પગ સખત જંજીરોથી બાંધવામાં આવેલા છે.
વિડીયોમાં નિહાળી શકાય છે કે આ તમામને એક લોખંડના ઢાંચાની ઉપરથી બાંધવામાં આવેલા છે. અને નીચે આગ લગાડી દેવામાં આવી છે. આ શિયા જવાનો પોતે હશ્દ શાબી ઉર્ફે પોપ્યુલર મોબલાઈઝેશન સંગઠનના સદસ્ય હોવાનું જણાવે છે.
આ જવાનોએ મરતા પહેલા જણાવ્યું હતુ કે તેમને અનબર પ્રાંતની રાજધાની રમાદીથી 400 કિલોમીટર દૂરથી બંધક બનાવવામાં આવ્યા હતા. આ વિડીયો ઈરાકના અનબરમાં શૂટ કરવામાં આવ્યો હતો. ISISએ જણાવ્યું હતુ કે આ ચારેય સરકાર તરફથી જાસૂસી કરવા માટે આવ્યા હતા.
વિડીયોમાં એક નકાબકોશ આતંકવાદી જણાવે છે કે ફલુઝા શહેરના પૂર્વમાં સ્થિત ગરમામાં શિયાઓ દ્વારા એક સુન્ની વ્યક્તિ અને દિયાલા પ્રાંતમાં ત્રણ સુન્નીઓને સળગાવીને મારવાના પ્રતિશોધમાં આ હત્યાઓ કરવામાં આવી છે.