રોજર ફેડરરના પત્નીએ ફરી જોડિયા બાળકોને જન્મ આપ્યો
મેડરિડ, 7 મે : ટેનિસ સ્ટાર રોજર ફેડરરના પત્નીએ ફરીવાર જોડિયા બાળકોને જન્મ આપ્યો છે. રોજર ફેડરર અને તેની પત્ની મીર્કા ફરીવાર (જોડિયા)TWIN બાળકોના માતા-પિતા બનવા બદલ તેમની જાતને ‘અત્યંત ખુશનસીબ' ગણાવી રહ્યા છે.
તેમણે આ અંગે મંગળવારે ટ્વિટ કરીને પોતાની ખુશી વ્યક્ત કરી હતી. ટ્વિટમાં રોજરે લખ્યું હતું કે લિયો અને લેનીના આગમનથી અમારા જીવનમાં ફરી ખુશીઓની બહાર આવી છે. નોંધનીય છે કે આજથી ચાર વર્ષ પહેલા ફેડરર પરિવારમાં જોડિયા બાળકીઓ માયલા રોઝ અને ચર્લેના રીવાનાનો જન્મ થયો હતો.
ફેડરરે ટ્વિટ કરીને જણાવ્યું હતું કે 'મીર્કા અને હું અત્યંત ઉત્સુકતાપૂર્વક જણાવીએ છીએ કે લીઓ અને લેનીનો જન્મ આજે સાંજે થયો હતો'
નોંધનીય છે કે 17 વખત ગ્રાન્ડ સ્લેમ વિજેતા બનેલા ફેડરરે અગાઉ મંગળવારે જ જાહેરાત કરેલી કે તે આ અઠવાડિયામાં યોજાનારી મેડ્રીડ ઓપન માસ્ટર્સમાં ભાગ લઇ શકશે નહિ કારણકે તેને તેની પત્ની સાથે બાળકના જન્મ સમયે હાજર રહેવું હતું.
ફેડરરે એમ પણ કહ્યું કે 'હું મારા ચાહકોની માફી માંગું છું અને આશા છે કે હું મેડ્રીડ ઓપનમાં આવતા વર્ષે ફરી ભાગ લઈશ.'