મની લોન્ડરિંગ કેસમાં બેંકો સામે કાર્યવાહી કરાશે : RBI

શ્રીનગર, 10 મે : ભારતીય રીઝર્વ બેન્કે કહ્યું છે કે વેબપોર્ટલ કોબ્રાપોસ્ટે કરેલા ગેરરીતિ વિશેના ઘટસ્ફોટમાં જે બેન્કોના નામ આવ્યા છે તેમની સામેની તપાસ પૂરી થઈ ગઈ છે અને જો તેઓ બેન્કિંગ ધારાધોરણોનો ભંગ કરવા માટે કસુરવાર ઠરશે તો એમની સામે પગલાં લેવામાં આવશે.

આરબીઆઈ તરફથી જણાવાયું છે કે તેણે આંતરિક તપાસ પૂરી કરી લીધી છે અને રિપોર્ટ પણ તૈયાર થઈ ગયો છે. ગેરરીતિઓમાં સંડોવણી માટે કસુરવાર ઠરનાર બેન્કો સામે પગલાં લેવામાં આવશે. કોબ્રાપોસ્ટે એક સ્ટિંગ ઓપરેશન કરીને એવો આરોપ મૂક્યો છે કે સ્ટેટ બેન્ક ઓફ ઈન્ડિયા સહિત જાહેર ક્ષેત્રની અનેક બેન્કો અને નાણાં સંસ્થાઓ મની લોન્ડ્રિંગ પ્રવૃત્તિઓ કરી રહી છે.

આ અંગે રિઝર્વ બેંકના ગવર્નર ડી સુબ્બારાવે જણાવ્યું કે ખોટું કામ કરનારી બેંકો સામે ક્યારે કાર્યવાહી કરવામાં આવશે તેની સમયસીમા કહેવી મુશ્કેલ છે. કારણ કે તેમાં અનેક પ્રકારની પ્રક્રિયાઓ સામેલ છે. બીજી તરફ કોબ્રા પોસ્ટે નવા અહેવાલો પણ પ્રસિદ્ધ કર્યા છે.

નવા અહેવાલોમાં જણાવાયું છે કે "ઓપરેશન રેડ સ્પાઇડર- ભાગ 3 કોડ વર્ડવાળી આવૃત્તિમાં કરવામાં આવેલા સ્ટિંગ મારફતે અમે 10 બેંકિંગ સંસ્થાઓ અને તેમની અંદર ચાલી રહેલી શંકાસ્પદ ગતિવિધિઓને બહાર લાવ્યા છીએ. આ બેંકોની ડઝનો શાખાઓના નીચલીથી લઇને ઉપલા અધિકારીઓએ શંકાસ્પદ ગતિવિધીની વાત સ્વીકારી છે."