ફોર્ચ્યુનની '40 અંડર 40' શક્તિશાળી વ્યક્તિઓની યાદીમાં 4 ભારતીય
ન્યુ યોર્ક : વિશ્વના અગ્રણી બિઝનેસ મેગેઝીન ફોર્ચ્યુન દ્વારા જાહેર કરવામાં આવેલી '40 અંડર 40' શક્તિશાળી વ્યક્તિઓની યાદીમાં એક ઇકોનોમિક્સના પ્રોફેસર અને ભારતની અગ્રણી ઓનલાઇન શોપિંગ કંપની સ્નેપડીલના સહસ્થાપક સહિત 4 ભારતીયોનો સમાવેશ કરવામાં આવ્યો છે.
ફોર્ચ્યુન્સ 2014 '40 અંડર 40'માં જે 4 ભારતીયોનો સમાવેશ થયો છે તેમાં 16મા ક્રમે અર્થશાસ્ત્રના પ્રોફેસર હાર્વર્ડ રાજ ચેટ્ટી, માઇક્રોમેક્સના સહસ્થાપક રાહુલ શર્મા 21મા ક્રમે, સ્નેપડીલના સહસ્થાપક અને સીઇઓ કુણાલ બહેલ 25મા ક્રમે અને ટ્વીટરના જનરલ કાઉન્સેલ અને કંપનીની એક્ઝિકયુટીવ ટીમના એક માત્ર મહિલા સભ્ય વિજયા ગડેનો 28મા ક્રમે સમાવેશ કરવામાં આવ્યો છે.
આ યાદીમાં પ્રથમ ક્રમે ઉબેરના 38 વર્ષીય સહસ્થાપક ટ્રાવિસ કલાનિકનો સમાવેશ થાય છે. તેમની જ સાથે હોસ્પિટાલિટી કંપની એરબીએનબીના 33 વર્ષીય સીઇઓ બ્રિયાન ચેસ્કીનો પણ સમાવેશ થાય છે.
આ યાદીમાં બીજા ક્ર્મે ફેસબુકના સ્થાપક અને સીઇઓ 30 વર્ષીય માર્ક ઝુકરબર્ગ આવે છે. જ્યારે ઇટાલીના સૌથી યુવાન વડાપ્રધાન મટ્ટેઓ રેન્ઝી (39 વર્ષ) ત્રીજા ક્રમે આવ્યા છે.