Pics : દીપિકાની પાર્ટીમાં ઉમટ્યું બૉલીવુડ, રણબીર ગાયબ, પણ કેમ?

Updated: Wednesday, February 4, 2015, 13:06 [IST]

મુંબઈ, 23 ડિસેમ્બર : બૉલીવુડ અભિનેત્રી દીપિકા પાદુકોણે માટે વર્ષ 2013 સફળતાઓથી ભરેલુ રહ્યું. ચાર-ચાર હિટ ફિલ્મો આપનાર દીપિકા પાદુકોણેએ પોતાની આ સફળતાની ઉજવણી કરવા માટે ગઈકાલે એક પાર્ટી આપી કે જેમાં બૉલીવુડમાંથી અનેક હસ્તીઓ ઉમટી પડી. મુંબઈમાં વર્લી ખાતેની એક હોટેલમાં યોજાયેલ આ બ્લૅક ગોલ્ડ પાર્ટીમાં દીપિકાએ ગોલ્ડન ડ્રેસ પહેરી પ્રવેશ કર્યો. તેમણે હીલ્સ પહેરેલી હતી, પરંતુ સફળતાની ઉજવણીમાં મસ્ત દીપિકાએ આ હીલ્સ ઉતારી દીધાં અને ખુલ્લા પગે આખી પાર્ટીમાં ફરતા રહ્યાં.

નોંધનીય છે કે દીપિકા પાદુકોણેએ આ વર્ષે રેસ 2 જેવી સફળ ફિલ્મથી શરુઆત કરી હતી અને તે પછી યે જવાની હૈ દીવાની, ચેન્નઈ એક્સપ્રેસ અને રામલીલા જેવી ઉપરાછાપરી ત્રણ ફિલ્મો સુપર હિટ રહી. દીપિકાની ચારે ફિલ્મો સો કરોડ ક્લબમાં જોડાઈ. તેથી દીપિકાએ આ પાર્ટી આપી હતી. આ પાર્ટીની સૌથી મહત્વની બાબત એ હતી કે તેમાં રણબીર કપૂર નહોતા પહોંચ્યાં. રણબીરને આમંત્રણ તો હતું, પરંતુ આમ છતાં તેઓ હાજર ન રહ્યાં. રણબીર કપૂર યે જવાની હૈ દીવાની ફિલ્મમાં દીપિકાના હીરો હતાં. ચર્ચા છે કે રણબીર એટલા માટે હાજર ન રહ્યાં, કારણ કે દીપિકાએ કૅટરીના કૈફને આમંત્રણ નહોતુ આપ્યું. હવે એ તો સૌ જાણે જ છે કે દીપિકા-કૅટ વચ્ચે કોલ્ડ-વૉર ચાલે છે.

દીપિકાની આ પાર્ટીમાં સૌપ્રથમ આવનારાઓમાં તેમના સારા મિત્ર રણવીર સિંહ હતાં. રામલીલા ફિલ્મમાં દીપિકાના હીરો રણવીર પાર્ટીમાં પૂરા મૂડમાં હતાં અને તેમણે બહુ મસ્તી કરી. રણવીરે જણાવ્યું કે બ્લૅક ગોલ્ડ ડ્રેસ કોડ હતું. તેથી આ પાર્ટી માટે ખાસ જૅકેટ તૈયાર કરાવ્યું. દીપિકાની પાર્ટીમાં ઐશ્વર્યા રાય અને અભિષેક બચ્ચન પણ ન પહોંચી શક્યાં. કહે છે કે ઐશના કોઈ નિકટની વ્યક્તિનું મોત થઈ જતાં આ જોડી હાજર ન રહી શકી. ઉપરાંત આ પાર્ટીમાં દીપિકાની તાજેતરની ત્રણે ફિલ્મોના દિગ્દર્શકો અયાન મુખર્જી (યે જવાની હૈ દીવાની), રોહિત શેટ્ટી (ચેન્નઈ એક્સપ્રેસ) તેમજ સંજય લીલા ભાનુશાળી (રામલીલા) પણ એક-બીજા સાથે મળતા દેખાયાં, તો શાહિદ કપૂર એટલા બધા ઉત્સાહિત હતાં કે તેમણે રણવીરને એકાધ ડાન્સ સ્ટેપ પણ શીખવાડ્યાં.

ચાલો જોઇએ તસવીરોમાં દીપિકાની બ્લૅક એન્ડ પાર્ટી :