ઉત્તરાખંડમાં કોંગ્રેસને મોટો ફટકો, ધારાસભ્ય રાજકુમાર BJPમાં જોડાયા
કોંગ્રેસના ધારાસભ્ય રાજકુમાર પાર્ટી છોડીને ભારતીય જનતા પાર્ટીમાં જોડાયા છે. ઉત્તરાખંડના પુરોલાથી કોંગ્રેસના ધારાસભ્યએ દિલ્હીના ભાજપ કાર્યાલયમાં ભાજપના ટોચના નેતાઓની હાજરીમાં પાર્ટી સભ્યપદ લીધું હતું.
દહેરાદૂન : આગામી વર્ષે ઉત્તરાખંડમાં ચૂંટણી પહેલા કોંગ્રેસ પાર્ટીને મોટો આંચકો લાગ્યો છે. કોંગ્રેસના ધારાસભ્ય રાજકુમાર પાર્ટી છોડીને ભારતીય જનતા પાર્ટીમાં જોડાયા છે. ઉત્તરાખંડના પુરોલાથી કોંગ્રેસના ધારાસભ્યએ દિલ્હીના ભાજપ કાર્યાલયમાં ભાજપના ટોચના નેતાઓની હાજરીમાં પાર્ટી સભ્યપદ લીધું હતું. આ દરમિયાન કેન્દ્રીય મંત્રી ધર્મેન્દ્ર પ્રધાન, ઉત્તરાખંડના મુખ્યમંત્રી પુષ્કર સિંહ ધામી, પ્રદેશ પ્રમુખ મદન કૌશિક ઉપસ્થિત રહ્યા હતા.
શનિવારથી રાજકુમાર ભાજપમાં જોડાશે, તેવી અટકળો ચાલી રહી હતી, કેટલાક કારણોસર તેમનો ભાજપમાં જોડાવાનો કાર્યક્રમ એક દિવસ માટે મુલતવી રાખવામાં આવ્યો હતો. રાજકુમારે ભાજપના ટોચના નેતૃત્વ સમક્ષ એક શરત રાખી હતી કે, પાર્ટી તેમને દેહરાદૂનથી ટિકિટ આપશે. રાજકુમારની આ શરતને કારણે તેમના ભાજપમાં જોડાવાના કાર્યક્રમમાં મોડું થયું હતું. રાજકુમાર પહેલા પ્રીતમ સિંહ પનવાર પણ ભાજપમાં જોડાયા છે.
રાજકુમારની વાત કરીએ તો તેમનો પરિવાર લાંબા સમયથી કોંગ્રેસ સાથે જોડાયેલો છે. રાજકુમારના પિતા પાટીદાસે વર્ષ 1985માં ઉત્તરાખંડના ઉત્તરકાશીથી કોંગ્રેસની ટિકિટ પર ચૂંટણી લડી હતી, પરંતુ ચૂંટણી હારી ગયા હતા. રાજકુમાર વિદ્યાર્થી રાજકારણમાં સક્રિય ન હતા.
વર્ષ 2007માં તેમણે ભાજપની ટિકિટ પર સહસપુર બેઠક પરથી ચૂંટણી લડી હતી. તે સમયે આ બેઠક અનામત હતી, પરંતુ બેઠક સામાન્ય થયા બાદ વર્ષ 2012માં તેઓ પુરોલા બેઠક પરથી અપક્ષ ઉમેદવાર હતા. જો કે આ ચૂંટણીમાં તેમને હારનો સામનો કરવો પડ્યો હતો. તેમને ભાજપના ઉમેદવાર માલચંદે હરાવ્યા હતા, પરંતુ વર્ષ 2017 માં રાજકુમારે કોંગ્રેસની ટિકિટ પર પુરોલાથી ચૂંટણી લડી અને આ વખતે તેમને ચૂંટણી જીત્યા હતા.