કેરળઃ પુલ તૂટી પડતાં 1નું મૃત્યુ, 57 ઘાયલ
કેરળના કોલ્લમમાં નદી પર બનાવામાં આવેલો લોખંડનો પુલ અચાનક તુટી પડ્યો હતો. તેના કારણેે એક વ્યક્તિનું મૃત્યુ થયુ હતું. આ અંગે વધુ વાંચો અહીં.
સોમવારે કેરળના કોલ્લમમાં નદી પર બનેલ એક લોખંડનો પુલ તૂટી પડતાં દુર્ઘટના સર્જાઇ હતી. પુલ તૂટી પડતાં એક વ્યક્તિનું મૃત્યુ થયું હતું અને આ સિવાય 57થી વધુ વ્યક્તિઓ ઇજાગ્રસ્થ હોવાના સમાચાર છે. રાહત અને બચાવ કાર્યની ટુકડી ઘટનાસ્થળે પહોંચી ગઇ છે. આ ઘટના કોલ્લમના છવારામાં બની હતી. કહેવાઇ રહ્યું છે કે, આ પુલ ઘણો જૂનો હતો અને તે જર્જરિત થઇ ગયો હતો.
સોમવારે જ્યારે પુલ તૂટી પડવાની ઘટના બની ત્યારે મોટી સંખ્યામાં લોકો આ પુલ પર હાજર હતા. પૂલ તૂટતાં જ લોકોએ બૂમાબૂમ કરતાં લોકો મદદ માટે દોડી આવ્યા હતા. પોલીસ પણ ઘટનાસ્થળે પહોંચી હતી અને તેમણે સ્થાનિક લોકોને મદદથી ઇજાગ્રસ્તોને નજીકની હોસ્પિટલમાં ખસેડ્યા હતા. પુલની હાલત કથળી ગઇ હોવાને કારણે જ આની પર કોઇ પણ પ્રકારના વાહનોની અવર-જવર બંધ હતી. જો કે, પગપાળા ચાલીને જવા માટે લોકો મોટી સંખ્યામાં આ પુલનો ઉપયોગ કરતા હતા.