ઉત્તર પ્રદેશ: શુગર મિલમાં ગેસ ગળતરને કારણે 500 બાળકો બીમાર
ઉત્તર પ્રદેશના શામળી જિલ્લામાં શુગર મિલમાંથી ગેસ લિક થવાને કારણે 500થી વધુ બાળકો બીમાર પડી ગયા છે.
ઉત્તર પ્રદેશના શામળી જિલ્લામાં શુગર મિલમાંથી ગેસ લિક થવાને કારણે 500થી વધુ બાળકો બીમાર પડી ગયા છે. બે શાળાના બાળકો આ ગેસ લિકને કારણે બીમાર પડ્યા છે. 30 બાળકોની હાલત ગંભીર છે, જેમને હોસ્પિટલમાં દાખલ કરવામાં આવ્યા છે. શુગર મિલમાંથી એવો કયો ગેસ લિક થયો છે, જેને કારણે બાળકોની આ હાલત થઇ, એ અંગે હજુ જાણકારી નથી મળી. મંગળવારે સવારે અચાનક જ મિલ પાસેની શાળામાં બાળકો બેભાન થઇ જતાં ચિંતાનું વાતાવરણ સર્જાયું હતું. શિક્ષકો તાત્કાલિક બાળકોને લઇને નજીકની જિલ્લાની હોસ્પિટલ પહોંચ્યા હતા. બીમાર બાળકોની સંખ્યા વધારે હોવાની કારણે જિલ્લાની હોસ્પિટલ દ્વારા પ્રાઇવેટ હોસ્પિટલમાં જવાનું સૂચન કરવામાં આવ્યું હતું.
હાલ તમામ બાળકો જોખમમુક્ત છે તથા પ્રશાસન તરફથી આ મામલે તપાસનું આશ્વાસન આપવામાં આવ્યું છે. શુગર મિલમાંથી કયો ગેસ લિક થયો હતો એ અંગે પ્રશાસન કે મિલના અધિકારીઓ તરફથી કોઇ જાણકારી આપવામાં આવી નથી. પ્રશાસન તરફથી કહેવામાં આવ્યું છે કે, આ મામલાની તપાસ બાદ જ કંઇ પણ કહી શકાશે. નોંધનીય છે કે, ઉત્તર પ્રદેશનો પશ્ચિમ વિસ્તાર શેરડીની ખેતી માટે જાણીતો છે. ઓક્ટોબરમાં શેરડીના પાકની લણણી શરૂ થાય છે, એવામાં આ સમયે શુગર મિલમાં તૈયારીઓ શરૂ કરવામાં આવે છે.