મોદી ઉપડ્યા આયરલેન્ડ અને અમેરિકાની યાત્રા પર
વડાપ્રધાન નરેન્દ્ર મોદી આજે સવારે તેમની આયરલેન્ડ અને અમેરિકાની વિદેશયાત્રા માટે રવાના થયા છે. નોંધનીય છે કે નરેન્દ્ર મોદી 23થી 28 સપ્ટેમ્બર સુધી આયરલેન્ડ અને અમેરિકાના આ પ્રવાસ પર રહેશે.
ત્યારે આજે મોદી આયરલેન્ડમાં આયરલેન્ડના વડાપ્રધાન એન્ડા કેનીને મળશે. નોંધનીય છે કે 60 વર્ષોમાં પહેલી વાર ભારતનો કોઇ વડાપ્રધાન આયરલેન્ડ જઇ રહ્યો છે. તો વળી મોદીનો આ વિદેશ પ્રવાસ આયરલેન્ડ અને ભારતના સંબંધોને મજબૂત કરશે તેવી આશા સેવાઇ રહી છે.
આ ઉપરાંત નરેન્દ્ર મોદી આયરલેન્ડના ભારતીય સમુદાયને પણ મળશે. જે બાદ તે 24 સપ્ટેમ્બરે અમેરિકા જવા નીકળશે. નોંધનીય છે કે મોદી ન્યૂયોર્કમાં થનારી સંયુક્ત રાષ્ટ્રની 70મી વર્ષગાંઠમાં પણ જોડાશે. અને આ સંમેલનને સંબોધિત પણ કરશે. સાથે જ અમેરિકાના રાષ્ટ્રપતિ બરાક ઓબામા દ્વારા આયોજીત શાંતિ સ્થાપનામાં પર એક બેઠકમાં પણ હાજરી આપશે.
ત્યારે ભારતીય સમય મુજબ નરેન્દ્ર મોદી બપોરે 3 વાગ્યા જેવા આયરલેન્ડના ડબલિન પહોચશે. જે બાદ તે ત્યાં 5 થી 6 કલાક જેવા રહેશે અને ત્યાં રાજકીય નેતાને મળશે. ભારતીય સમય મુજબ સાંજે 7:30 વાગે તે ભારતીય સમુદાયને સંબોધિત કરી તે બાદ ન્યૂયોર્ક જવા નીકળશે.