IPL Auction: કોણ છે કાયલ જેમિસન જેના પર આરસીબીએ 15 કરોડ ખર્ચ્યા

રોયલ ચેલેન્જર્સ બેંગલોરે ગુરુવારે ચેન્નઇમાં જારી થયેલ ખેલાડીઓની હરાજીમાં ન્યૂઝિલેન્ડના બોલર કાયલ જેમિસનને ઈન્ડિયન પ્રીમિયર લીગ (આઈપીએલ) 2021 સીઝન માટે 15 કરોડમાં ખરીદ્યો છે. આ હરાજીમાં જેમિસન અત્યાર સુધીનો બીજો સૌથી મોંઘો ખેલાડી બન્યો છે. જેમિસનની બેઝ પ્રાઈસ 75 લાખ રૂપિયા હતી.

કાયલ જેમિસન હજુ સુધી આઈપીએલ રમ્યો નથી. આ તેની પ્રથમ આઈપીએલ હશે. ન્યૂઝીલેન્ડનો ઉંચો (6 ફૂટ 8 ઇંચ) ઝડપી બોલર કાયલ જેમિસન 26 વર્ષનો છે. લોકો તેને બીજો આદ્રે રસેલ કહે છે. આનું કારણ એ છે કે તેઓ બોલની સાથે સાથે બેટ પણ જોરદાર ઘુમાવે છે. 26 વર્ષિય યુવા ફાસ્ટ બોલરે વર્ષ 2020 ને પોતાનું વર્ષ બનાવ્યું છે. તેણે ત્રણેય ફોર્મેટમાં ન્યુઝીલેન્ડ માટે ડેબ્યૂ કર્યું હતું અને તેની રમતથી કિવિ ચાહકોને પ્રભાવિત કર્યા હતા.

કાયલ જેમિસન કારકિર્દીની વાત કરીએ તો તેણે 38 ટી -20 મેચ રમી છે, જેમાં 20 ની સરેરાશથી 54 વિકેટ લીધી છે. આ સાથે તેણે 27 ની સરેરાશથી 190 રન પણ બનાવ્યા છે. જો કે તેની આંતરરાષ્ટ્રીય ટી 20 કારકિર્દી કંઈ ખાસ નહોતી અને તેણે ન્યૂઝીલેન્ડ માટે અત્યાર સુધી ચાર મેચ રમી છે. આમાં તેણે માત્ર ત્રણ વિકેટ ઝડપી છે. જોકે હવે કોહલીની ટીમને તેની પાસેથી મોટી આશા છે.