રાજ્યમાં ખાતરનો જથ્થો પૂરતા પ્રમાણમાં ઉપલબ્ધ-ગુજરાત સરકાર

By Desk

Updated: Monday, December 1, 2025, 20:41 [IST]

રાજ્યમાં ખેડૂતો માટે ખાતરની પૂરતી ઉપલબ્ધતા સુનિશ્ચિત કરવા રાજ્ય સરકારે ખાતર વિતરણનું સુદ્રઢ આયોજન કર્યું છે. હાલના સમયમાં રાજ્યભરમાં ૨.૦૮ લાખ મેટ્રિક ટન યુરિયા અને ૪૯ હજાર મેટ્રિક ટન ડી.એ.પી.નો જથ્થો ખેડૂતો માટે ઉપલબ્ધ છે.

ખેતી નિયામકની કચેરીએ ખેડૂતોને કોઈ પણ ખોટી અફવાઓથી દૂર રહેવા અને જરૂરિયાત મુજબ જ ખાતર ખરીદવા અનુરોધ કર્યો છે. રાજ્યમાં રવિ સિઝન દરમિયાન દરેક ખેડૂતને સમયસર અને પૂરતા પ્રમાણમાં ખાતર મળી રહે તે માટે આયોજન કરવામાં આવ્યું છે.

ભારત સરકારે રવિ સિઝન માટે ગુજરાતને જરૂરી ખાતરનો પૂરતો જથ્થો ફાળવ્યો છે, જેથી ખેડૂતોએ ચિંતા કરવાની જરૂર નથી. વણજોઈતી ખરીદી ટાળવા અને જરૂરિયાત મુજબ જ ખાતર લેવા માટે ખેડૂતોને વિનંતી કરવામાં આવી છે.

રાજ્યના દરેક જિલ્લાની જરૂરિયાતને ધ્યાનમાં રાખીને સપ્લાય પ્લાન મુજબ ખાતરનો જથ્થો વિતરિત કરવામાં આવી રહ્યો છે. ચાલુ રવિ સિઝન એટલે કે ઓક્ટોબર-૨૦૨૫ થી માર્ચ-૨૦૨૬ માટે ભારત સરકારે ગુજરાતને કુલ ૧૩.૯૦ લાખ મેટ્રિક ટન યુરિયા અને ૨.૯૦ લાખ મેટ્રિક ટન ડી.એ.પી. ખાતરની ફાળવણી મંજૂર કરી છે.

આ ફાળવણીમાંથી અત્યાર સુધીમાં ૫.૪૮ લાખ મેટ્રિક ટનથી વધુ યુરિયા અને ૨.૧૮ લાખ મેટ્રિક ટનથી વધુ ડી.એ.પી. ખાતર રાજ્યમાં ઉપલબ્ધ થયું છે. ચાલુ રવિ સિઝન દરમિયાન ખેડૂતો દ્વારા ૩.૪૪ લાખ મેટ્રિક ટનથી વધુ યુરિયા અને ૧.૬૮ લાખ મેટ્રિક ટનથી વધુ ડી.એ.પી. ખાતરનો ઉપયોગ કરવામાં આવ્યો છે.

હાલમાં, રાજ્યના વિવિધ જિલ્લાઓમાં કુલ ૨.૦૮ લાખ મેટ્રિક ટનથી વધુ યુરિયા અને ૪૯ હજાર મેટ્રિક ટનથી વધુ ડી.એ.પી. ખાતરનો જથ્થો ઉપલબ્ધ છે. છેલ્લા ત્રણ દિવસમાં આશરે ૧૨,૫૦૦ મેટ્રિક ટન યુરિયા ખાતર રેલવે રેકના માધ્યમથી વિવિધ જિલ્લાઓમાં સપ્લાય કરવામાં આવ્યું છે.

હાલમાં, જુદા જુદા ૭ રેક પોઈન્ટ પરથી યુરિયા ખાતરનો સપ્લાય ચાલુ છે. આગામી અઠવાડિયામાં પણ અંદાજે ૨૨,૦૦૦ મેટ્રિક ટન યુરિયા ખાતરનો સપ્લાય કરવા માટે સૂચનાઓ અપાઈ છે, જેથી દરેક ખેડૂતને પૂરતો જથ્થો મળી રહે.

આમ, રાજ્યમાં ખાતરનો પૂરતો જથ્થો ઉપલબ્ધ છે અને જરૂરિયાત મુજબ જિલ્લાવાર સપ્લાય ચાલુ છે. ખેડૂતોને અફવાઓથી દૂર રહેવા અને માત્ર જરૂરિયાત પૂરતું જ ખાતર ખરીદવા અનુરોધ કરવામાં આવ્યો છે.