ધ ન્યૂ ફેસ ઓફ ઇન્ડિયા- ભારતનુ આ આઇટી સિટી

By Super

Updated: Monday, February 2, 2015, 17:09 [IST]

ટ્રાફિકથી ફૂલ રસ્તાઓ અને હાઇ રાઇઝ ઇમારતોવાળા આઇટી શહેર બેંગ્લોરે ભારતને એક નવો ચહેરો આપ્યો છે, જ્યાં રહેવા અને કામ કરવાનું સ્વપ્ન દરેક યુવાનનું હોય છે. ભણતર અને નોકરીના કારણે અન્ય શહેરોની સરખામણીએ ભારતનું આ શહેર યુવાઓના માનસપટમાં વસેલું છે, આ શહેરને ભારતનું આઇટી હબ કહેવામાં આવ છે અને વિશ્વના સૌથી યોગ્ય વ્યવસાયિક શહેર તરીકેનો દરરજો પણ આ શહેરને મળેલો છે.

બેંગ્લોરએ કર્નાટક રાજ્યનું કોસ્મોપોલિટન શહેર છે. અહીંની મુખ્યભાષા કન્નડ છે, પરંતુ અહીં દેશની મોટાભાગની તમામ ભાષાઓ બોલાય છે, કારણ કે અહીં દેશ વિદેશના વિવિધ પ્રાન્તના લોકો કામ અર્થે આવે છે. બેંગ્લોરની કૂલ વસ્તીના 51 ટકા લોકો ભારતના વિવિધ પ્રાન્તોમાંથી આવીને વસેલા છે. જો કે, તેમ છતાં મોટા ભાગે અહીં તમીળ, તેલુગુ, હિન્દી અને અંગ્રેજી ભાષાનો પ્રયોગ વધુ પ્રમાણમાં કરવામાં આવે છે.

બેંગ્લોર પ્રત્યેનું યુવાનોનું આકર્ષણ પણ એ વાત પરથી સાબિત થઇ જાય છે કે, અહીં અનેક મહત્વની ઇન્સ્ટિટ્યૂટ આવેલી છે. જેમ કે આઇઆઇએમ, ઇન્ડિયન ઇન્સ્ટિટ્યૂટ ઓફ સાયન્સ, નેશનલ લો સ્કૂલ, ઇન્ડિયન ઇન્સ્ટિટ્યૂટ ઓફ ઇન્ફોર્મેશન એન્ડ ટેક્નોલોજી, એનસીબીએસ સહિતની અનેક ઇન્સ્ટિટ્યૂટ અહીં હોવાના કારણે યુવાનો ઉચ્ચ અભ્યાસ અર્થે પણ આ શહેરને વધુ પ્રાધાન્ય આપી રહ્યાં છે.

બેંગ્લોર શહેરનો ઇતિહાસ પણ જાણવા જેવો છે. ૧૫૩૭માં બેંગ્લોર ની સ્થાપના કેમ્પે ગોવડા દ્વારા કરવામાં આવી હોવાનું માનવામાં આવી રહ્યુ છે. પૌરાણિક કાળમાં આ શહેરનો ઉલ્લેખ કલ્યાણપૂરી તરીકે કરવામાં આવતો હતો, મોર્ય શાશક ચંદ્રગુપ્ત મોર્યે પોતાના રાજપાટનો ત્યાગ કર્યો અને આ શહેરની દક્ષિણમાં આવેલા શ્રવણબેલગોડામાં જૈન ધર્મનો અંગીકાર કર્યો હતો. ત્યારબાદ 1638માં બીજાપુરના સુલતાન આદિલ શાહ પાસેથી મરાઠા શાસક શાહજી ભોંસલેએ બેંગ્લોર પર કબજો કર્યો, ત્યારબાદ આ શાસન મોગલો આવ્યા અને મોગલે આ રાજ્ય મૈસુરના રાજા ચીક્કદેવરાયને દાનમાં આપી દીધું, તેમના ગયા પછી 1759માં હૈદરઅલીએ આ કિલ્લાને મજબૂત કરાવ્યો અને છેલ્લે ટીપુ સુલતાનને હરાવીને બેંગ્લોર પર બ્રિટશ સરકારે કબજો કર્યો હતો અને બ્રિટિશર્સે આ શહેરનું નામ બેંગ્લોર કર્યું હતું, જે આજે બેંગાલુરુ તરીકે જાણીતું બન્યું છે. તો ચાલો તસવીરોના માધ્યમથી જોઇએ ધ ન્યૂ ફેસ ઓફ ઇન્ડિયા બેંગ્લોરને.