શું તમે આ બોલીવુડ સિતારાઓને વોટ આપશો?

By Gajendra

Updated: Monday, April 21, 2014, 12:18 [IST]

ગાંધીનગર, 21 એપ્રિલ: બોલીવુડ સિતારાઓ જાહેર જીવનમાં ભાગ્યેજ દેખાતા હોય છે, અને ખાસ કરીને રાજકારણથી તેઓ દૂર જ રહેવામાં પોતાની ભલાઇ સમજતા હોય છે. પરંતુ જેમ નરેન્દ્ર મોદી કહે છે તેમ 'આ વખતની ચૂંટણી કોઇ પક્ષોની નથી પરંતુ દેશના નાગરિકોની છે.' જે હિસાબે દેશના નાગરિકોમાં બોલીવુડ સિતારાઓનો પણ સમાવેશ થાય છે.

અત્યાર સુધી આપણને બોલીવુડ સિતારાઓ પરદા પર માત્ર 'Voting is your right, Please do vote...' એવું કહેતા જ દેખાયા છે. પરંતુ પહેલીવાર સ્થિતિ બદલાઇ છે. અને કહેવાય છેને કે 'કોઇપણ વસ્તુ ક્યારેકને ક્યારેક તો પહેલીવાર જ બને છે!'. સ્થિતિ એટલા માટે બદલાઇ છે કારણ કે જે અભિનેતાઓ આપણને માત્ર પરદા પર જ દેખાતા હતા તે હવે લોકોની વચ્ચે રસ્તા પર પણ દેખાતા થયા છે. આને આ સ્થિતિને શક્ય બનાવી છે માત્રને માત્ર ચૂંટણી મહોત્સવે.

હા ઘણા અભિનેતા-અભિનેત્રીઓ હવે અભિનય છોડીને નેતા બનવાના મૂડમાં છે. ગઇ લોકસભાની ચૂંટણીની સરખામણીમાં આ વખતની ચૂંટણીમાં ઝંપલાવનાર બોલીવુડ સિતારાઓની સંખ્યામાં ધરખમ વધારો થયો છે. જેમને આપણે આંગળીના ટેરવે ગણાવી શકીએ નહીં.

અત્રે ઉલ્લેખનીય છે કે આ વખતની ચૂંટણી એવી છે કે જેમાં બોલીવુડ સિતારાઓ સર્વાધીક જોવા મળી રહ્યા છે, માત્ર પ્રચારમાં જ નહીં પરંતુ તેઓ પોતે કોઇને કોઇ લોકસભા બેઠક પરથી ચૂંટણી લડી રહ્યા છે, જેમાં પરેશ રાવલ, કિરણ ખેર, ગુલ પનાગ, હેમા માલિની, વિનોદ ખન્ના, શત્રુઘ્ન સિન્હા, નગમા, મનોજ તિવારી, રવિ કિશન, રાખી સાવંત, જાવેદ ઝાફરી, મુનમુન સેન, રાજ બબ્બર, સ્મૃતિ ઇરાણી, બપ્પી લહેરી, મહેશ માંજરેકર, કમાલ ખાન, જયા પ્રદા, બાબુલ સુપ્રિયો જેવા દિગ્ગજ અભિનેતા-અભિનેત્રીઓનો સમાવેશ થાય છે.

જોકે સૌથી મોટો પ્રશ્ન અત્રે એ ઉદભવે છે કે પેરાશૂટ દ્વારા રાજનીતિના અખાડામાં લેંડીંગ કરનારા આ અભિનેતાઓને જનતા પોતાના નેતા તરીકે સ્વીકારશે કે કેમ? જેમને સામાજીક કાર્યો સાથે કોઇ લેવાદેવા નથી તેવા એક્ટર-એક્ટ્રેસીસ પર નાગરિકો પોતાની પસંદગીની મહોર લગાવશે કે કેમ? જોકે હવે લોકો અભણ, અસમજ અને નેતાઓની ભાષામાં બાઉદ રહ્યા નથી કે તેઓ કોઇ સેલિબ્રિટીને સમજી વિચાર્યા વગર પોતાનો નેતા ચૂંટી લે. આ સ્થિતિમાં એ પ્રશ્ન યક્ષ બની જાય છે કે સેલિબ્રિટીઓને વોટ મળશે કે કેમ?

સ્લાઇડરમાં જુઓ કઇ સેલિબ્રિટી ક્યાંથી લડી રહી છે ચૂંટણી...

પરેશ રાવલ

જાણીતા અભિનેતા પરેશ રાવલ ભાજપની ટિકિટ પરથી ગુજરાતની અમદાવાદ પૂર્વ બેઠક પરથી ચૂંટણી લડી રહ્યા છે.

જયા પ્રદા

જાણીતી અભિનેત્રી જયા પ્રદા ઉત્તર પ્રદેશમાં રાષ્ટ્રીય લોક દળ તરફથી ચૂંટણી લડી રહી છે.

ગુલ પનાગ

અભિનેત્રી ગુલ પનાગ ચંદીગઢથી આમ આદમી પાર્ટીની ટિકિટ પરથી ચૂંટણી લડી રહી છે.

નગમા

અભિનેત્રી નગમાં કોંગ્રેસની ટિકિટ પર મેરઠથી ચૂંટણી લડી રહી છે.

કિરણ ખેર

જાણીતી અભિનેત્રી અને અનુપમ ખેરની પત્ની કિરણ ખેર ચંદીગઢથી ભાજપની ટિકિટ પરથી ચૂંટણી લડી રહી છે.

હેમા માલિની

'ડ્રિમ ગર્લ' હેમા માલિની મથુરાથી ભાજપની ટિકિટ પર ચૂંટણી લડી રહી છે.

વિનોદ ખન્ના

વિનોદ ખન્ના ભાજપની ટિકિટ પરથી ગુરુદાસપુરથી ચૂંટણી લડી રહ્યા છે. 2002માં વિનોદ ખન્ના કેન્દ્રીય મંત્રી પણ રહી ચૂક્યા છે.

શત્રુઘ્ન સિન્હા

શત્રુઘ્ન સિન્હા ભાજપની ટિકિટ પરથી પટણા સાહિબ બેઠક પરથી ચૂંટણી લડી રહ્યા છે. શત્રુઘ્ન સિન્હા આ પહેલા 2002-2004માં કેન્દ્રીય કેબિનેટ મંત્રી રહી ચૂક્યા છે.

સ્મૃતિ ઇરાણી

જાણીતી ટીવી સ્ટાર સ્મૃતિ ઇરાણીએ રાજકારણમાં પોતાનો પગ જમાવી લીધો છે, સ્મૃતિને સુષમા સ્વરાજ સાથે સરખાવવામાં આવી રહી છે. સ્મૃતિ ઇરાણી ભાજપ તરફથી અમેઠીમાં રાહુલ ગાંધીને પડકાર આપી રહી છે.