આંતરરાષ્ટ્રીય સ્તરે ચમકશે ભારતીય ફિલ્મ કુરિંજી, જાણો સ્ટોરી

ફિલ્મકારવાં, ઈસ્ટર્ન ઈગલ અને બ્લૂ મંડે પ્રોડક્શન હાઉસ સાથે મળીને નવી ફિલ્મ 'કુરિંજી' (Kurinji) લાવવા માટે તૈયાર છે. આ પ્રોજેક્ટને આંતરરાષ્ટ્રીય સ્તરે બર્લિનાલે ટેલેન્ટ્સ સ્ક્રિપ્ટ સ્ટેશનમાં રજૂ કરી સરાહના મેળવી છે.

વર્ષ 2022માં આ ફિલ્મને પ્રતિષ્ઠિત કોમ્પાન્યોન ફેલોશિપ મળી હતી અને વર્ષ 2024માં ગોવા NFDC ફિલ્મ બજારમાં પણ આ પ્રોજેક્ટ પ્રથમ ક્રમે રહ્યો હતો. આ પ્રોજેક્ટ હવે વૈશ્વિક સ્તરે ચર્ચામાં છે.

આ ફિલ્મની વાર્તા કેરળની લાલી નામની મજબૂત મહિલાની આસપાસ ફરે છે, જેનો પતિ વિદેશમાં કામ કરે છે. અચાનક બાર વર્ષ બાદ પતિ સાથેનો સંપર્ક તૂટી જતાં તે મુશ્કેલીમાં મુકાય છે.

લાલી તેના ગુમ થયેલ પતિને શોધવા માટે એક લોકપ્રિય ટીવી પ્રોગ્રામની મદદ લે છે. આ શોધ દરમિયાન તેને તેના પતિના છુપાયેલા જીવન વિશે કેટલીક આઘાતજનક હકીકતો જાણવા મળે છે.

પતિની શોધ અને અનિશ્ચિત ભવિષ્ય વચ્ચે લાલી પોતાની ઓળખ અને જીવનને નવા દ્રષ્ટિકોણથી જોવાનું શરૂ કરે છે. આ વાર્તા એક મહિલાના સંઘર્ષ અને તેની મક્કમતાની સફર દર્શાવે છે.

ફિલ્મનું શીર્ષક નીલગિરીના પર્વતોમાં 12 વર્ષે એકવાર ખીલતા 'કુરિંજી' ફૂલ પરથી રાખવામાં આવ્યું છે. આ ખાસ ફૂલ ધીરજ, રાહ અને પરિવર્તનનું સચોટ પ્રતીક માનવામાં આવે છે.

ફ્રાન્સની જાણીતી નિર્માતા નથાલી મેઝુરે આ ફિલ્મની સંવેદનશીલ વાર્તાથી પ્રભાવિત થઈને તેની સાથે જોડાવાનો નિર્ણય લીધો છે. જર્મનીની પ્રોડક્શન કંપની પણ આ પ્રોજેક્ટમાં રસ દાખવી રહી છે.

દિગ્દર્શિકા પાયલ સેઠીના જણાવ્યા અનુસાર, આ ફિલ્મ પ્રવાસી કામદારોની પત્નીઓના ભાવનાત્મક એકાંત અને તેમના પારિવારિક સંઘર્ષને રજૂ કરે છે. તે આધુનિક ભારતીય મહિલાની છબીને ઉજાગર કરે છે.

નિર્માતા સોનાલી બાવા માને છે કે આ ફિલ્મ ભારતીય મહિલાઓના જીવનની વાસ્તવિક લાગણીઓને સ્પર્શે છે. આ એક એવી વાર્તા છે જે દરેક પ્રેક્ષકો સાથે ભાવનાત્મક જોડાણ સ્થાપિત કરશે.

English summary

Kurinji depicts Lali, a Kerala woman balancing family life as her husband works overseas. The narrative follows her search for truth through local support initiatives, uncovering secrets that force a reassessment of her future. The project showcases international collaboration and reflects on economic and emotional impacts of migration.