ત્રણેય ખાનોને લઈ ફિલ્મ બનાવશે રણબીર : જુઓ કેટલો મોટો છે પડકાર?

Updated: Thursday, August 21, 2014, 13:05 [IST]

મુંબઈ, 21 ઑગસ્ટ : બૉલીવુડ અભિનેતા રણબીર કપૂરે થોડાક દિવસ અગાઉ કહ્યુ હતું કે તેઓ પોતાના અભિનેતા-ફિલ્મ નિર્માતા દાદાજી રાજ કપૂર ઉપર એક લઘુ ફિલ્મ બનાવવા માંગે છે. રણબીર કપૂરની મહેચ્છા હવે આ લઘુ ફિલ્મમાં બૉલીવુડના ત્રણેય ખાનોને લેવાની છે. રણબીરે જણાવ્યું - મેં કહી તો દીધું કે હું દાદાજી ઉપર લઘુ ફિલ્મ બનાવીશ, પણ આવુ કહ્યા બાદ મને વિચાર આવ્યો કે રાજ કપૂરના જીવન વિશે બતાવવામાં લઘુ ફિલ્મ નાની પડી જશે. આવુ કરવામાં મને 500 કલાક લાગશે.

રણબીરે જણાવ્યું - પરંતુ તે પછી મેં એમ પણ વિચાર્યુ કે હું કોની ઉપર લઘુ ફિલ્મ બનાવી શકું? પછી મેં આઠ મિનિટની એક લગુ ફિલ્મ બનાવવા અંગે વિચાર્યું કે જેમાં શાહરુખ ખાન, સલમાન ખાન અને આમિર ખાન એક સોફા ઉપર બેઠેલા હોય અને માત્ર વાતો કરતા હોય.

રણબીર કપૂરે આ ઇચ્છા તો વ્યક્ત કરી દીધી, પરંતુ બૉલીવુડના આ ત્રણેય ખાનો વચ્ચેના સંબંધો જે પ્રકારના છે, તે જોતા લાગે છે કે રણબીરે ઇચ્છા નહીં, પણ મહેચ્છા વ્યક્ત કરી છે. રણબીરની આ ઇચ્છા ક્યાંક સ્વપ્ન બની ન રહી જાય. કોણ નથી જાણતું કે બૉલીવુડમાં શાહરુખ-સલમાન વચ્ચે સંબંધો કઈ હદે વણસેલા છે. કોણ નથી જાણતુ કે શાહરુખ-આમિરની આજ સુધી કોઈ પણ ફુલ-ફ્લૅશ ફિલ્મ લોકોને જોવા નથી મળી. કોણ નથી જાણતું કે અંદાઝ અપના-અપના બાદ સલમાન-આમિરની જોડી જોવા લોકો તલસી ગયાં.

ચાલો હાલ તો આપને બતાવીએ શાહરુખ-સલમાન-આમિરે સ્ક્રીન-શૅર કરેલી જૂજ ફિલ્મો :

શાહરુખ-આમિર

શાહરુખ ખાન અને આમિર ખાન બૉલીવુડના એવા બે ખાન છે કે જેમની વચ્ચે કોઈ ખુલ્લી લડાઈ નથી. બંને એક-બીજા સાથે વાત કરે છે, મંચ શૅર કરે છે, પણ સ્ક્રીન શૅર નથી કરતાં.

એકમાત્ર ફિલ્મ

શાહરુખ-આમિરની લીડ રોલ ધરાવતી કોઈ ફિલ્મ નથી બની. જોકે 1993માં આવેલી આશુતોષ ગોવારીકર દિગ્દર્શિત ફિલ્મ પહલા નશામાં શાહરુખ અને આમિર બંનેએ કૅમિયો રોલ કર્યા હતાં. આ ફિલ્મ દીપક તિજોરી, પૂજા ભટ્ટ, રવીના ટંડન અને પરેશ રાવલની હતી.

શાહરુખ-સલમાન

હવે વાત બૉલીવુડમાં પોતાના સંબંધો અંગે સતત ચર્ચામાં રહેતા શાહરુખ-સલમાનની વાત કરીએ.

યાદગાર કરણ-અર્જુન

શાહરુખ-સલમાનની યાદગાર ફિલ્મ હતી રાકેશ રોશનની કરણ-અર્જુન. આ ફિલ્મ સુપરહિટ રહી હતી. આજે પણ લોકો શાહરુખ-સલમાનની જોડીને કરણ-અર્જુનના નામે જ સંબોધે છે.

હર દિલ જો પ્યાર કરેગા

સલમાન ખાન, પ્રીતિ ઝિંટા અભિનીત હર દિલ જો પ્યાર કરેગા ફિલ્મમાં શાહરુખે કૅમિયો કર્યો હતો.

હમ તુમ્હારે હૈં સનમ

શાહરુખ-સલમાને હમ તુમ્હારે હૈં સનમ ફિલ્મમાં પણ સ્ક્રીન શૅર કરી હતી કે જેમાં માધુરી દીક્ષિત પણ હતાં.

કુછ કુછ હોતા હૈ

શાહરુખ ખાન, કાજોલ અને રાણી મુખર્જીના લીડ રોલ ધરાવતી કુછ કુછ હોતા હૈ ફિલ્મમાં સલમાન ખાને કૅમિયો રોલ કર્યો હતો. જોકે તેમનો રોલ ખાસો લાંબો લગભગ 20 મિનિટનો હતો.

દુશ્મન દુનિયા કા

1996માં આવેલી મેહમૂદ દિગ્દર્શિત ફિલ્મ દુશ્મન દુનિયા કામાં જીતેન્દ્ર, મંજૂર અલી, સુમનલતા, લલિતા મહેદીન, જ્હૉની લીવર, ફરીદા જલાલ અને મેહમૂદ લીડ રોલમાં હતાં, પરંતુ આ ફિલ્મમાં શાહરુખ-સલમાને કૅમિયો રોલ કર્યા હતાં.