Bigg બૉસમાં Big બબાલ : હાઈજૅક ટાસ્કમાં કરિશ્માના ‘મરચાં’ લાગતાં ગૌતમ લાલધુમ!

Updated: Tuesday, September 30, 2014, 12:26 [IST]

મુંબઈ, 30 સપ્ટેમ્બર : કલર્સનો વિવાદાસ્પદ શો બિગ બૉસ ધીમે-ધીમે પોતાના અસલી રંગમાં આવતો જાય છે. બિગ બૉસની આ 8મી સીઝન છે અને તેમાં પહેલા અઠવાડિયે તો શોના સ્વભાવની વિરુદ્ધ શાંતિ રહી, પરંતુ તે ધીમે-ધીમે પોતાના અસલ સ્વરૂપમાં આવવો શરૂ થઈ ગયો છે.

બિગ બૉસ 8 શો ગત 21મી સપ્ટેમ્બરથી શરૂ થયો છે. ગઈકાલે પહેલી વખત બિગ બૉસમાં સ્પર્ધકોને બિગ બૉસનો અવાજ સંભળાયો છે. બિગ બૉસે જાહેરાત કરી કે સ્પર્ધકો આજે નવા ઘરમાં શિફ્ટ થનાર છે. આ સાંભળી સૌ ખુશ થઈ ગયાં, પણ તેમની ખુશી એક જ પળમાં ગાયબ થઈ ગઈ કે જ્યારે બિગ બૉસે તેમને કહ્યું કે તેના બદલે કિંમત ચુકવવી પડશે.

બિગ બૉસમાં બે સીક્રેટ સોસાયટી દીપશિખા તથા આરજે પ્રીતમની એન્ટ્રી થઈ ચુકી છે. બિગ બૉસે સૌને તેમનો પ્રથમ ટીમ ટાસ્ક આપ્યો કે જેનું નામ છે હાઈજૅક. બિગ બૉસે તમામ સ્પર્ધકોને બે ટીમોમાં વહેંચ્યા છે. એક ટીમના કૅપ્ટન દીપશિખા છે અને તેમાં કરિશ્મા તન્ના, ડાયંડ્રા, મિનીષા લાંબા, સુશાંત, ઉપેન પટેલ અને આર્ય બબ્બર છે, તો બીજી ટીમમાં આરજે પ્રીતમની કૅપ્ટનસી હેઠળ સુકૃતિ, નતાશા, પુનીત ઇસ્સાર, પ્રણીત તથા ગૌતમ ગુલાટી છે.

હાઈજૅક ટાસ્કમાં પ્રીતમની ટીમે ગાર્ડનમાં મૂકેલી સીટ પર કબ્જો જમાવેલો છે. હવે દીપશિખાની ટીમે કોઈ પણ રીતે વિરોધી ટીમને આ સીટ ઉપરથી હટાવવી છે. તેના માટે શારીરિક રીતે ફોર્સ ન કરી શકાય, પણ પોતાની જીત માટે બીજુ કંઈ પણ કરી શકાય. જે ટીમ જીતશે, તેને બિગ બૉસના ઘરમાં જવાની તક મળશે.

પ્રીતમની ટીમને સીટ ઉપરથી ખસેડવા માટે દીપશિખાની ટીમે અનેક પ્રકારની યુક્તિઓ અપનાવી. ગંદા મોજા સુંઘાડ્યાં, શેવિંગ ફોમ લગાવ્યું, વાળમાં શૅંપૂ લગાવ્યું, ગંદી ચંપલો તેમની ઉપર રગડી. આમ છતાં કોઈ સીટ ઉપરથી ખસ્યું નહીં.

ગૌતમ, પ્રણીત તથા પુનીત આ ટાસ્કને એન્જૉય કરતા હતાં, પરંતુ આ પછી દીપશિખાની ટીમે વિરોધી ટીમ પર લાલ મરચાંનો પાવડર નાંખવાનું અને રગડવાનું શરૂ કર્યું. જ્યારે ગૌતમથી સહન ન થયું, તો તેમણે કરિશ્મા તન્ના સામે બૂમો પાડવાનું શરૂ કર્યું અને ગાળો પણ આપવા લાગ્યાં. આમ આ ખુશહાલ પરિવારના પહેલા વિલન બન્યાં ગૌતમ ગુલાટી.

તે પછી કેટલાક સ્પર્ધકો રડતા હતાં, તો કેટલાક નારાજ હતાં અને કેટલાક મૌન હતાં. સૌએ ગૌતમને સાઇડલાઇન કર્યાં અને તેમની સાથે અબોલા લીધાં. ગૌતમે ઘરવાળાઓને ઘણી વાર વિનંતી કરી કે તેઓ તેમની સાથે વાત કરે. ગૌતમે કરિશ્મા પાસે પણ માફી માંગી, પરંતુ કરિશ્માએ દયા બતાવવાનો ધરાર ઇનકાર કર્યો. ગૌતમની આ હરકત બાદ બાકીના લોકોએ કરિશ્માનો સાથ આપતા ટાસ્ક કરવાનો ઇનકાર કરી દીધો. સૌએ આ પરિસ્થિતિને ખરાબ કરવાની જગ્યાએ એક-બીજા સાથે સ્ટૅંડ લેતા ટાસ્ક નહીં કરવાનો નિર્ણય કર્યો.

સૌ સ્પર્ધકોએ મળી બિગ બૉસને જણાવ્યું કે તેઓ પહેલા ગૌતમના વ્યવહાર અંગે કોઈ નિર્ણય કરે. ત્યાં સુધી સૌ સ્પર્ધકો બિગ બૉસના નવા ઘરમાં જવામાં કોઈ રસ નથી ધરાવતાં. કરિશ્માનું કહેવું છે - હું એક ફૅર ડિસીઝન ઇચ્છુ છું. હું કોઈ ટાસ્ક નથી કરી રહી, ભાડમાં જાય બધું. કરિશ્મા ઇચ્છે છે કે ગૌતમ ગુલાટીને તેના ખરાબ વ્યવહાર બદલ અયોગ્ય જાહેર કરવામાં આવે.

હવે જોવાનું એ રહે છે કે બિગ બૉસ ગૌતમ ગુલાટીને આ ભૂલ બદલ કઈ સજા આપે છે? કારણ કે અહીં તો બિગ બૉસ બધુ જુએ છે અને દરેક ભૂલ કરનારને સજા ભોગવવી જ પડે છે.

ચાલો જોઇએ બિગ બૉસ 8ના પ્રથમ વિવાદની તસવીરો :