ગુજરાતની ૩૪ શાળાઓને બોમ્બથી ઉડાવી દેવાની ધમકી, અમદાવાદ-વડોદરા પોલીસ એક્શનમાં

સોમવારની વહેલી સવારે ગુજરાતના બે મોટા શહેરો અમદાવાદ અને વડોદરાની શાળાઓમાં ખળભળાટ મચી ગયો હતો. અજાણ્યા સ્ત્રોત દ્વારા કુલ ૩૪ શાળાઓને બોમ્બથી ઉડાવી દેવાની ધમકી આપતા ઈ-મેઈલ મળતા તંત્ર સતર્ક બન્યું છે.

ઘટનાની ગંભીરતાને જોતા શાળાઓમાં તાત્કાલિક રજા જાહેર કરી દેવામાં આવી હતી અને વિદ્યાર્થીઓને સલામત સ્થળે ખસેડાયા હતા. પોલીસ કાફલો, બોમ્બ ડિસ્પોઝલ સ્ક્વોડ અને ડોગ સ્ક્વોડની ટીમોએ દરેક કેમ્પસમાં સઘન તપાસ શરૂ કરી છે.

ધમકીભર્યા મેઈલમાં શાળાઓની સાથે બસોમાં પણ બોમ્બ હોવાનો ભયાનક ઉલ્લેખ કરવામાં આવ્યો હતો. આથી સુરક્ષા એજન્સીઓએ સ્કૂલ બસ અને વાનનું પણ બારીકાઈથી ચેકિંગ હાથ ધરી સમગ્ર વિસ્તારને સીલ કરી દીધો છે.

વડોદરાની કુલ ૧૮ નામાંકિત શાળાઓને નિશાન બનાવીને આ ધમકી મોકલવામાં આવી હોવાનું સામે આવ્યું છે. જેમાં ડી. આર. અમીન, બરોડા હાઈસ્કૂલ, બ્રાઈટ અને આત્મીય જેવી શાળાઓમાં તપાસનો ધમધમાટ તેજ કરવામાં આવ્યો છે.

આ સાથે જ અમદાવાદની ૧૬ શાળાઓને પણ આવા જ પ્રકારના ધમકીભર્યા ઈ-મેઈલ મળતા વાલીઓમાં ભારે ફાળ પડી છે. શહેરની ડીએવી, એશિયા, સંત કબીર અને સીએન વિદ્યાલય જેવી શાળાઓમાં પોલીસ સુરક્ષા વધારી દેવાઈ છે.

પ્રાથમિક તપાસ મુજબ તમામ ઈ-મેઈલ એક જ સમાન પેટર્નથી મોકલવામાં આવ્યા હોવાનું પોલીસનું અનુમાન છે. મેઈલમાં દેશના વડાપ્રધાન અને ગૃહમંત્રીને લઈને પણ વાંધાજનક લખાણ લખવામાં આવ્યું હોવાની વિગતો છે.

આ મેઈલમાં "ગુજરાત ખાલિસ્તાન બનશે" જેવા ઉશ્કેરણીજનક શબ્દોનો પ્રયોગ કરી આતંક ફેલાવવાનો પ્રયાસ કરાયો છે. ભૂતકાળમાં પણ આ પ્રકારની અનેક નકલી ધમકીઓ મળી હોવાથી પોલીસ સાયબર એંગલથી તપાસ કરી રહી છે.

તંત્ર દ્વારા વાલીઓને ગભરાવાની જરૂર નથી તેવી અપીલ કરવામાં આવી છે અને સુરક્ષા વ્યવસ્થા ચુસ્ત કરી દેવાઈ છે. હાલમાં આ ધમકી પાછળ કયા અસામાજિક તત્વોનો હાથ છે તે જાણવા તપાસના ચક્રો ગતિમાન કરાયા છે.

English summary

Gujarat schools in Ahmedabad and Vadodara evacuated after bomb threat emails. Authorities conducted thorough checks, deploying bomb disposal units and tracking leads to ensure student safety. The incident follows a pattern of earlier threats and underscores ongoing inter agency cooperation.