રાહુલ-હાર્દિકની હોટલ મુલાકાત પાછળનું સત્ય શું છે?
શું સોમવારે હાર્દિક પટેલે અમદાવાદની તાજ હોટલમાં રાહુલ ગાંધી સાથે મુલાકાત કરી હતી? સીસીટીવી ફૂટેજ એ તરફ જ ઇશારો કરે છે. આ અંગે હાર્દિક પટેલનું શું કહેવું છે?
સોમવારે કોંગ્રેસ ઉપાધ્યક્ષ રાહુલ ગાંધી ગુજરાતની મુલાકાતે હતા, આ દરમિયાન તેઓ પાટીદાર નેતા હાર્દિક પટેલ સાથે મુલાકાત કરવા માંગતા હતા પરંતુ હાર્દિકે પહેલા જ જણાવી દીધું હતું કે, તે સોમવારે વ્યસ્ત હોવાથી રાહુલ ગાંધીને નહીં મળી શકે. ત્યાર બાદ સોમવારે સાંજે જે સીસીટીવી ફૂટેજ બહાર આવ્યા એ અનુસાર, અમદાવાદની જે હોટલમાં રાહુલ ગાંધી રોકાયા હતા, એ જ હોટલમાં એ જ સમયગાળા દરમિયાન હાર્દિક પટેલ પણ હાજર હતા. આ વાત મીડિયામાં પ્રસરતા મંગળવારે હાર્દિકે પોતાના નિવેદનમાં જણાવ્યું હતું કે, તેઓ રાહુલ ગાંધીને મળશે તો ખુલીને બધાની સામે મળશે, આમ છુપાઇ નહીં.
અન્ય એક CCTV ફૂટેજ
ત્યાર બાદ હવે સમાચાર ચેનલ એબીપી ન્યૂઝ ચેનલ દ્વારા અન્ય એક સીસીટીવી ફૂટેજને આધારે દાવો કરવામાં આવ્યો છે કે, તાજ ઉમ્મેદ હોટલના રૂમ નંબર 224માં રાહુલ ગાંધી અને હાર્દિક પટેલની મુલાકાત થઇ હતી અને આ મુલાકાત 40 મિનિટ કરતા લાંબી ચાલી હતી. સીસીટીવી ફૂટેજમાં પહેલા હાર્દિક પટેલ રૂમ નંબર 224માંથી બહાર નીકળતા જોવા મળે છે અને ત્યાર બાદ રાહુલ ગાંધી પણ એ જ રૂમમાંથી બહાર નીકળતા જોવા મળે છે. જો કે, ફૂટેજમાં ક્યાંય આ બંને સાથે જોવા મળતા નથી.
હાર્દિક પટેલનું નિવેદન
આ સમગ્ર મામલે હાર્દિકે ટ્વીટ કરતાં કહ્યું હતું કે, ગુજરાતમાં હજારો લિટર દારૂ પણ ભાજપની નજર હેઠળ બોર્ડર પરથી આવે છે, ત્યારે આ સીસીટીવી ક્યાં જાય છે? આ સીસીટીવી ફૂટેજની વાત મીડિયામાં પ્રસર્યા બાદ પણ હાર્દિક પટેલ પોતાના મત પર અડગ છે અને તેમણે જણાવ્યું હતું કે, હું રાહુલ ગાંધીને નથી મળ્યો. મેં તમામ સીસીટીવી ફૂટેજ જોયા છે અને એમાં ક્યાંય પણ મારી રાહુલ ગાંધી સાથે મુલાકાત થઇ હોય એ વાત સ્પષ્ટ થતી નથી. ભાજપ એ જવાબ આપે કે આ ફૂટેજ લીક કઇ રીતે થયા? આ રીતે તો મારી પ્રાઇવસીનું હનન થયું છે. ગુજરાતમાં બોર્ડર પરથી હજારો લિટર દારૂ આવે છે ત્યારે આ સીસીટીવી ફૂટેજ ક્યાં જાય છે?