Gandhinagar: જિલ્લા કક્ષાની નવરાત્રિ રાસ-ગરબા સ્પર્ધા 2025નું આયોજન, 28 જુલાઈ ફોર્મ ભરવાની છેલ્લી તારીખ

Gandhinagar News: ગુજરાત સરકારના રમતગમત, યુવા અને સાંસ્કૃતિક પ્રવૃત્તિ વિભાગ, ગાંધીનગર તથા કમિશનર, યુવક સેવા અને સાંસ્કૃતિક પ્રવૃત્તિઓની કચેરી, ગાંધીનગર દ્વારા જિલ્લા કક્ષા નવરાત્રિ રાસ-ગરબા સ્પર્ધા 2025નું આયોજન કરવામાં આવ્યું છે. આ સ્પર્ધામાં ભાગ લેનાર ઇચ્છુક ઉમેદવારોએ જિલ્લા યુવા અને સાંસ્કૃતિક પ્રવૃત્તિઓની કચેરી અમદાવાદ - રવિશંકર રાવળ કલા ભવન ખાતે રૂબરૂ જમા કરાવવાનું રહેશે.

નવરાત્રિ રાસ-ગરબાનું આયોજન

જિલ્લા યુવા અને સાંસ્કૃતિક પ્રવૃત્તિઓની કચેરી, અમદાવાદ દ્વારા સંચાલિત જિલ્લા કક્ષા નવરાત્રિ રાસ-ગરબા સ્પર્ધા, 2028-26 માટે ફોર્મ ભરવાની અંતિમ તારીખ 28 જુલાઈ 2025 રાખવામાં આવી છે. ઉલ્લેખનીય છે કે, પ્રાચીન ગરબા તથા અર્વાચીન ગરબા સ્પર્ધામાં 14થી 35 વર્ષનાં બહેનો ભાગ લઈ શકશે. જ્યારે રાસની સ્પર્ધામાં ભાગ લેનાર બહેનો તથા ભાઈઓની વય મર્યાદા 14થી 40 વર્ષ સુધીની રહેશે. પ્રાચીન, અર્વાચીન ગરબા તેમજ રાસની રજૂઆતનો સમય 06થી 10 મિનિટનો રહેશે. પ્રાચીન, અર્વાચીન ગરબા તેમજ રાસમાં ભાગ લેનાર વ્યક્તિઓની એક વૃંદમાં 12થી 16 સંખ્યા રાખી શકશે. સાથે ચાર વાદ્યકારો રાખી શકાશે.

આ સ્પર્ધામાં ભાગ લેનાર ઈચ્છુક ઉમેદવારોએ નિયત નમૂનાનું ફોર્મ આધાર કાર્ડની નકલ સાથે 28 જુલાઈ 2025 સુધીમાં કચેરીના કામકાજના દિવસો દરમિયાન જિલ્લા યુવા અને સાંસ્કૃતિક પ્રવૃત્તિઓની કચેરી, અમદાવાદ, રવિશંકર રાવળ કલા ભવન ખાતે રૂબરૂ જમા કરાવવાનું રહેશે. સમયમર્યાદા પછી આવનાર ફોર્મ તથા અધૂરી વિગતવાળા ફોર્મ સ્વીકાર્ય રહેશે નહીં. તેમજ વધુ માહિતી માટે કચેરી ખાતે રૂબરૂ સંપર્ક કરવાનો રહેશે.

English summary

Gandhinagar: District level Navratri Raas-Garba 2025 organized, last date for filling the form is 28 July