ગુજરાત રાજ્યની જીએસટી આવકમાં મોટો વધારો, જાણો તાજા આંકડા

By Desk

Updated: Wednesday, April 1, 2026, 20:30 [IST]

ગુજરાત સ્ટેટ જીએસટી વિભાગની વાર્ષિક આવકમાં મોટો ઉછાળો જોવા મળ્યો છે. ચાલુ વર્ષે વિભાગની કુલ આવકમાં 19 ટકાનો માતબર વધારો નોંધાયો હોવાનું સામે આવ્યું છે.

માર્ચ 2026ના મહિનામાં સ્ટેટ જીએસટીની આવક 7,352 કરોડ રૂપિયા સુધી પહોંચી ગઈ છે. ગત વર્ષે માર્ચ 2025માં આ જ આવક અંદાજે 6,190 કરોડ રૂપિયા જેટલી હતી.

વિભાગને વેટ દ્વારા 2,714 કરોડ અને વિદ્યુત શુલ્ક પેટે 1,328 કરોડની કમાણી થઈ છે. જ્યારે વ્યવસાય વેરાના માધ્યમથી માર્ચ મહિનામાં 24 કરોડ રૂપિયાની આવક થઈ છે.

માર્ચ 2026માં જીએસટી વિભાગની તમામ સ્ત્રોતની કુલ આવક 11,418 કરોડ નોંધાઈ છે. સમગ્ર નાણાકીય વર્ષ 2025-26 દરમિયાન જીએસટીની કુલ આવક 81,410 કરોડ રહી છે.

ગત વર્ષની તુલનામાં રાજ્યની ટેક્સ આવકમાં કુલ 11.1 ટકાનો સકારાત્મક વધારો થયો છે. જે રાજ્યની આર્થિક ગતિશીલતા અને મજબૂત કર વ્યવસ્થાનો સીધો સંકેત આપે છે.

વર્ષ 2025-26માં વેટ હેઠળ 32,677 કરોડ અને વિદ્યુત શુલ્ક દ્વારા 12,493 કરોડ મળ્યા છે. આ સાથે વ્યવસાય વેરાની વાર્ષિક કુલ આવક 266 કરોડ રૂપિયા નોંધાઈ છે.

આ તમામ ક્ષેત્રોની આવકને ભેગી કરતા વર્ષ દરમિયાન કુલ 1,26,846 કરોડની કમાણી થઈ છે. જીએસટી વિભાગની આ સિદ્ધિ સરકારી તિજોરી માટે ખૂબ જ મહત્વની ગણાય છે.