ગુજરાતમાં આ સ્થળોએ પાંચ દિવસ સુધી ભારે વરસાદની હવામાન વિભાગની આગાહી

હવામાન વિભાગે આગાહી કરી છે કે રાજ્યમાં હજુ પણ પાંચ દિવસ સુધી ભારે વરસાદ વરસી શકે છે.

અમદાવાદઃ હવામાન વિભાગે આગાહી કરી છે કે રાજ્યમાં હજુ પણ પાંચ દિવસ સુધી ભારે વરસાદ વરસી શકે છે. આજે રાજ્યના ઉત્તર ગુજરાત, દક્ષિણ ગુજરાત, મધ્ય ગુજરાત, સૌરાષ્ટ્રમાં ભારેથી અતિ ભારે વરસાદની સંભાવના છે. આગલા પાંચ દિવસ ઉત્તર ગુજરાતના બનાસકાંઠા, સાબરકાંઠા, પાટણ, અરવલ્લી અને ગાંધીનગરમાં ધોધમાર વરસાદનુ અનુમાન હવામાન વિભાગે વ્યક્ત કર્યુ છે. વળી, સૌરાષ્ટ્રમાં સામાન્યથી મધ્યમ વરસાદ થવાની સંભાવના પણ છે. રાજ્યમાં છેલ્લા 2-3 દિવસથી વરસાદી માહોલ જામ્યો છે. હાલમાં વરસાદી સિસ્ટમ સક્રિય હોવાના કારણે માછીમારોને દરિયો ન ખેડવા માટે હવામાન વિભાગે સૂચના આપી છે.

વડોદરામાં ગઈ રાતે શરૂ થયેલો વરસાદ આજે સવારે પણ ચાલુ છે. વડોદરામાં આખી રાતમાં 4 ઈંચ વરસાદ નોંધવામાં આવ્યો છે. આખુ શહેર જળબંબાકાર થઈ ગયુ છે. અલકાપુરી રેલવે સ્ટેશનના ગરનાળામાં પાણી ભરાઈ જતા ત્યાં વાહન વ્યવહાર બંધ કરી દેવામાં આવ્યો છે. વરસાદના કારણે ગણેશ પંડાલોમાં પણ પાણી ભરાઈ ગયા હતા. વડોદરાના ડભોઈમાં પણ જોરદાર વરસાદ થયો હતો. ડભોઈ પંથકમાં ગઈ કાલે મોડી સાંજે ગાજવીજ સાથે મન મૂકીને વરસાદ વરસ્યો હતો.

ઉત્તર ગુજરાતમાં વરસાદે માઝા મૂકી છે. અરવલ્લીમાં મોડી રાતથી ધોધમાર વરસાદ વરસી રહ્યો છે. છેલ્લા 24 કલાકમાં ભિલોડામાં 3 ઈંચ વરસાદ ખાબક્યો છે. મોડાસા, ધનસુરા અને મેઘરજમાં 2-2 ઈંચ, માલપુરમાં 1 ઈંચ જ્યારે બાયડમાં સામાન્ય વરસાદ નોંધવામાં આવ્યો છે. અરવલ્લીમાં સિઝનનો 44.24 ટકા વરસાદ નોંધાયો છે, જે સિઝનના કુલ 11 ઈંચ વરસાદ છે. રાજ્યમાં જો કે હજુ સુધી વરસાદની 35 ટકા જેટલી ઘટ છે.

તમને જણાવી દઈએ કે ગુજરાતમાં 168 તાલુકામાં વરસાદ નોંધાવા સાથે સિઝનનો કુલ વરસાદ 57 ટકા સુધી પહોંચ્યો છે. ગુજરાતમાં સૌથી વધારે 63.12 ટકા વરસાદ દક્ષિણ ગુજરાતમાં, સૌરાષ્ટ્રમાં 61.56 ટકા વરસાદ, કચ્છમાં પણ 56.30 વરસાદ થયો છે. મધ્ય ગુજરાત અને પૂર્વ મધ્ય ગુજરાતમાં વરસાદનુ પ્રમાણ 50 ટકાથી ઓછુ છે. ઉપરવાસમાં સારો વરસાદ થતા ડેમમાં નવા નીર આવ્યા છે. ઉકાઈ ડેમમાં 800 ક્યુસેક પાણીની આવક થઈ છે. સરદાર સરોવર નર્મદા ડેમની સપાટીમાં પણ વધારો થયો છે. નર્મદાની સપાટી 119.41 મીટર સુધી પહોંચી ગઈ છે. હાલમાં રાજ્યમાં વરસી રહેલા વરસાદથી ગુજરાતની પાણીની સમસ્યા ઘણે અંશે ઉકેલાઈ છે.

English summary

Gujarat Rain: Heavy rain for five days at these places in Gujarat, forecast by the meteorological department.