નૂર ભાડામાં વધારાથી સૌરાષ્ટ્રના મીઠા ઉદ્યોગને 100 કરોડનો ફટકો

Updated: Thursday, June 26, 2014, 18:29 [IST]

વઢવાણ, 26 જૂન : નરેન્દ્ર મોદી સરકારે સત્તામાં આવતા જ રેલવે ભાડા અને રેલવે નૂરમાં વધારો કર્યો છે. આ વધારો 25 જૂનથી અમલમાં પણ આવી ગયો છે. રેલવે નૂરમાં 6.5 ટકાનો વધારો કરવામાં આવ્યો છે. આ વધારાની સીધી અસર નરેન્દ્ર મોદી જે રાજ્યમાંથી આવે છે તે ગુજરાતને મોટી અસર કરશે. ગુજરાતના સૌરાષ્ટ્રમાં આવેલા મીઠા ઉદ્યોગને તેનો સૌથી મોટી અસર થવાની છે અને તેના કારણે ગુજરાતના મીઠા ઉદ્યોગને વાર્ષિક રૂપિયા 100 કરોડનો ફટકો પડવાનો અંદાજ છે.

નોંધનીય છે કે ગુજરાતનો સૌરાષ્ટ્ર પ્રદેશ દેશના કુલ મીઠા ઉત્પાદનમાં 70 ટકા હિસ્સો ધરાવે છે. હવે સૌરાષ્ટ્રના મીઠા ઉદ્યોગ પર આવી પડેલા રૂપિયા 100 કરોડના બોજની સીધી અસર સમગ્ર દેશમાં મીઠાના ભાવ ઉપર પડશે. આ કારણે મીઠા આધારિત તમામ વસ્તુઓમાં ભાવ વધારાની અસર જોવા મળશે.

ગુજરાતમાં ખારાઘોડા અને પારડીમાં દેશનું સૌથી વધારે મીઠું પાકે છે. અહીં કાર્યરત મીઠા ઉદ્યોગના જણાવ્યા અનુસાર ખારાઘોડામાંથી દર મહિને રેલવેની 30 રેક જેટલું મીઠું દેશના વિવિધ ભાગમાં મોકલવામાં આવે છે. એટલે કે અંદાજે 3 લાખ ટન જેટલું મીઠું દર મહિને રેલવે મારફતે પરિવહન થાય છે.

હવે રેલવે નૂરમાં સાડા છ ટકાનો વધારો થતા મીઠા ઉદ્યોગ પર માસિક છથી સાત કરોડ રૂપિયાનો બોજ પડ્યો છે. અહીંના મીઠા ઉદ્યોગ પર અંદાજે 25,000 પરિવારો પર નભે છે. તેમના ઉપર પણ વધારાની અસર જોવા મળશે.

આ ઉપરાંત લવણપુર અને નવલખીથી દર મહિને અંદાજે 4,000 ટન મીઠું રેલવે દ્વારા વિવિધ ભાગોમાં મોકલવામાં આવે છે. આ કારણે નૂર ભાડાંમાં સાડા છ ટકાનો વધારો તેમના માટે કમરતોડ સાબિત થશે.