Quad Delhi Meeting: ઈન્ડો-પેસિફિકમાં સુરક્ષાથી લઈને ઉર્જા સંકટ સુધી! ક્વાડ દેશોની બેઠકમાં કયા મુદ્દાઓ પર ચર્ચા
ભારતની યજમાનીમાં દિલ્હી ખાતે ક્વાડ દેશોના વિદેશ મંત્રીઓની એક મહત્વપૂર્ણ બેઠક યોજાઈ હતી. આ બેઠકમાં ભારત, અમેરિકા, જાપાન અને ઓસ્ટ્રેલિયાએ ઇન્ડો-પેસિફિક ક્ષેત્રની સુરક્ષા, દરિયાઈ દેખરેખ, સપ્લાય ચેઈન અને નવી ટેકનોલોજી જેવા મુદ્દાઓ પર ચર્ચા કરી. ભારતના વિદેશ મંત્રી એસ. જયશંકર, અમેરિકી વિદેશ મંત્રી માર્કો રુબિયો, ઓસ્ટ્રેલિયાના વિદેશ મંત્રી પેની વોંગ અને જાપાનના વિદેશ મંત્રી હાજર રહ્યા હતા.
ક્વાડ બેઠકમાં ઇન્ડો-પેસિફિક ક્ષેત્રની સુરક્ષા પર વિશેષ ભાર મૂકવામાં આવ્યો હતો. વિદેશ મંત્રી એસ. જયશંકરે જણાવ્યું કે, ચારેય દેશો દરિયાઈ લોકશાહીના પ્રણેતા છે અને આ વિસ્તારમાં સ્થિરતા જાળવી રાખવી અતિમહત્વપૂર્ણ છે. તેમણે સમુદ્રી દેખરેખ, લોજિસ્ટિક્સ નેટવર્ક, સમુદ્ર તળિયાના કેબલની સુરક્ષા અને આપત્તિ રાહત જેવા મુદ્દાઓમાં સહયોગ વધારવા પર ભાર મૂક્યો. ક્વાડ દેશોએ ઇન્ડો-પેસિફિકને સ્વતંત્ર, ખુલ્લું અને સુરક્ષિત રાખવા માટે સક્રિયપણે કામ કરવાની પ્રતિબદ્ધતા પુનરાવર્તિત કરી.
ઓસ્ટ્રેલિયાના વિદેશ મંત્રી પેની વોંગે હોर्मुઝ સ્ટ્રેટના સંકટ અંગે ચિંતા વ્યક્ત કરી હતી. તેમણે ચેતવણી આપી કે જો ઈરાન હોर्मुઝ સ્ટ્રેટને બંધ કરશે, તો તેની ગંભીર અસર ઇન્ડો-પેસિફિક દેશોની ઊર્જા સુરક્ષા પર પડશે. વોંગે દરિયાઈ માર્ગોની સ્વતંત્રતા જાળવી રાખવાને અત્યંત જરૂરી ગણાવ્યું. તેમણે અમેરિકી વિદેશ મંત્રી માર્કો રુબિયોના રાજદ્વારી પ્રયાસોની પ્રશંસા કરી અને ઉમેર્યું કે, આ ક્ષેત્રમાં સ્થિરતા અને ભરોસાપાત્ર વિકલ્પો પૂરા પાડવાની જવાબદારી ક્વાડ દેશોની છે.
અમેરિકી વિદેશ મંત્રી માર્કો રુબિયોએ બેઠક બાદ દરિયાઈ સુરક્ષા સંબંધિત બે મોટી પહેલની જાહેરાત કરી. જેમાં પ્રથમ, 'ઇન્ડો-પેસિફિક મેરીટાઇમ સર્વેલન્સ કોઓપરેશન ઇનિશિયેટિવ' દ્વારા ક્વાડ દેશો દરિયાઈ માહિતીની આપ-લે કરશે. બીજી પહેલ, 'ઇન્ડો-પેસિફિક મેરીટાઇમ ડોમેઇન અવરનેસ ઇનિશિયેટિવ'નું વિસ્તરણ છે, જે ક્ષેત્રના દેશોને રીઅલ-ટાઇમ દરિયાઈ ડેટા પ્રદાન કરશે. રુબિયોએ 'ક્વાડ એટ સી' મિશનના આગલા તબક્કાની યજમાની માટે ભારતનો આભાર પણ માન્યો.
બેઠકમાં સપ્લાય ચેઈન મજબૂત કરવા અને નવી ટેકનોલોજીમાં ભાગીદારી વધારવા પર પણ ચર્ચા થઈ. એસ. જયશંકરે જણાવ્યું કે, દુનિયા હાલમાં કનેક્ટિવિટીના અવરોધો, ઉત્પાદન અને આવશ્યક સંસાધનોની અછત જેવી પડકારજનક સ્થિતિનો સામનો કરી રહી છે. ક્વાડ દેશોનો ઉદ્દેશ્ય ભરોસાપાત્ર અને પારદર્શક ભાગીદારી દ્વારા આ સમસ્યાઓનું નિરાકરણ લાવવાનો છે. મહત્વપૂર્ણ ખનીજો, ડિજિટલ ટેકનોલોજી અને માળખાકીય સુવિધાઓમાં સહયોગ વધારવા પર સર્વસંમતિ સધાઈ.
જાપાનના વિદેશ મંત્રી તોશિમિત્સુ મોતેગીએ આ બેઠકને વિશ્વ માટે સ્પષ્ટ સંદેશ ગણાવ્યો. તેમણે ભારપૂર્વક જણાવ્યું કે, "ક્વાડ દેશો સ્વતંત્ર અને ખુલ્લા ઇન્ડો-પેસિફિક માટે પૂરી તાકાતથી કામ કરશે." મોતેગીએ ઉમેર્યું કે, ઇન્ડો-પેસિફિક દેશોએ આર્થિક સુરક્ષા અને વ્યૂહાત્મક મજબૂતી વધારવી આવશ્યક છે. તેમણે આશા વ્યક્ત કરી કે, આગામી સમયમાં ક્વાડ દેશોનો સહયોગ વધુ ગાઢ બનશે. જાપાને પણ દરિયાઈ સુરક્ષા અને આર્થિક ભાગીદારીને મજબૂત કરવા પર ભાર મૂક્યો.
Click it and Unblock the Notifications
Sign in with Google
