ઈરાનના અનેક શહેરોમાં ફરી વિસ્ફોટ, અમેરિકા બોલ્યું- હુમલામાં અમારો કોઈ હાથ નથી

પશ્ચિમ એશિયામાં ફરી એકવાર તણાવ વધી રહ્યો છે. ઈરાનના દક્ષિણ અને દરિયાકાંઠાના અનેક શહેરોમાં વિસ્ફોટોના અહેવાલ સામે આવ્યા છે. આ ઘટનાઓ એવા સમયે બની છે જ્યારે ઈરાન, અમેરિકા અને ઇઝરાયલ વચ્ચેના સંબંધો પહેલાથી જ તંગ છે.

ઈરાની મીડિયા અનુસાર બુશેહર, કોનારક, ચાબહાર, બંદર અબ્બાસ અને ચોગાદક સહિતના વિસ્તારોમાં અલગ-અલગ સમયે જોરદાર ધડાકા સંભળાયા હતા. જોકે આ વિસ્ફોટોનું ચોક્કસ કારણ શું હતું તે અંગે હજુ સુધી કોઈ સત્તાવાર માહિતી જાહેર કરવામાં આવી નથી.

પ્રાથમિક અહેવાલો મુજબ આ વિસ્ફોટોમાં મોટા પાયે જાનહાનિ કે ભારે નુકસાન થયાની માહિતી સામે આવી નથી. ઈરાન સરકારે પણ હજુ સુધી તેને કોઈ વિદેશી હુમલો ગણાવ્યો નથી અને કોઈ સંગઠન કે દેશે તેની જવાબદારી સ્વીકારી નથી.

વિસ્ફોટોના સમાચાર વચ્ચે અમેરિકાએ સ્પષ્ટતા કરી છે કે તેણે ઈરાન પર કોઈ નવો હુમલો કર્યો નથી. અમેરિકી પ્રશાસનનું કહેવું છે કે આ ઘટનામાં અમેરિકાની કોઈ ભૂમિકા નથી. આ નિવેદનથી અનેક અટકળો પર થોડા સમય માટે વિરામ લાગ્યો છે.

બીજી તરફ, ઈરાનની ઇસ્લામિક રિવોલ્યુશનરી ગાર્ડ કોર્પ્સ (IRGC)એ અમેરિકાને ચેતવણી આપી છે કે હોર્મુઝ જળમાર્ગમાં કોઈપણ પ્રકારની દખલગીરી કરવાથી પરિસ્થિતિ વધુ ગંભીર બની શકે છે. IRGCનું કહેવું છે કે જો તણાવ વધશે તો વૈશ્વિક વેપાર અને તેલ પરિવહન પર પણ અસર પડી શકે છે.

આ દરમિયાન અમેરિકાના રાષ્ટ્રપતિ ડોનાલ્ડ ટ્રમ્પ અને ઇઝરાયલના વડાપ્રધાન બેન્જામિન નેતન્યાહૂ વચ્ચે ફોન પર વાતચીત થઈ હોવાનું પણ સામે આવ્યું છે. ઇઝરાયલના વડાપ્રધાન કાર્યાલયના જણાવ્યા અનુસાર બંને નેતાઓએ પ્રાદેશિક સુરક્ષા અને પરસ્પર સહયોગ જેવા મુદ્દાઓ પર ચર્ચા કરી હતી. જોકે વાતચીતની સંપૂર્ણ વિગતો જાહેર કરવામાં આવી નથી.

બીજી તરફ, ઈરાન સાથે સંકળાયેલી એક સમાચાર એજન્સીએ દાવો કર્યો છે કે તાજેતરના અમેરિકી હવાઈ હુમલામાં ઈરાનના આઠ સૈનિકોના મોત થયા છે. જોકે આ દાવાની અમેરિકા તરફથી સ્વતંત્ર પુષ્ટિ કરવામાં આવી નથી.