દ્વારકામાં જોઇ શકશો પાણીની અંદરનો નજારો, જાણો સબમરીન પ્રોજેક્ટની ખાસ વાત

Dwarka submarine project: ગુજરાત રાજ્યમાં શહેરોના વિકાસ સાથે સાથે બિઝનેસ હબ પણ બનાવવામાં આવી રહ્યું છે. આ માટે કેન્દ્ર સરકાર અને રાજ્ય સરકાર દ્વારા સતત વિકાસ કાર્યો કરવામાં આવી રહ્યા છે.

ગુજરાતના શહેરોમાં આવેલા સોમનાથ અને દ્વારકા જેવા ધાર્મિક સ્થળો આધ્યાત્મિક, ધાર્મિક અને પ્રવાસન સ્થળો તરીકે જાણીતા છે. વધુને વધુ પ્રવાસીઓ અહીં પહોંચી શકે અને ધાર્મિક સ્થળોનો ભરપૂર આનંદ માણી શકે, તે માટે રાજ્ય સરકાર સતત અનેક પ્રોજેક્ટ લાવી રહી છે.

દ્વારકાને મળશે મોટી ભેટ - આ ઉપક્રમે સિગ્નેચર બ્રિજ બાદ દ્વારકાને વધુ એક મોટી ભેટ મળવા જઈ રહી છે. દ્વારકાધીશ શહેરમાં આવતા તમામ પ્રવાસીઓ ભવિષ્યમાં પાણીની અંદરનો નજારો જોઈ શકશે. દ્વારકા આવતા પ્રવાસીઓ હવે સબમરીન દ્વારા પાણીની અંદરનો નજારો જોઈ શકશે. આ પ્રોજેક્ટ શરૂ થવામાં અંદાજે 7 મહિનાનો સમય લાગશે.

પ્રવાસન મંત્રી મુળુ બેરાએ દ્વારકામાં આવનારા આ નવા પ્રવાસન સ્થળ અંગે જણાવ્યું હતું કે, દ્વારકામાં સબમરીન સેવા શરૂ કરવામાં આવી રહી છે, જેથી પ્રવાસીઓ દરિયાઈ જીવન નિહાળી શકે.

રાજ્ય સરકારે કર્યો કરાર - આ માટે સરકાર દ્વારા કંપની સાથે MOU કરવામાં આવ્યા છે. આ કંપની સબમરીન પ્રોજેક્ટ માટે લગભગ 150 કરોડ રૂપિયાનું રોકાણ કરશે. આ પ્રોજેક્ટ પીપીપી મોડલ તરીકે લાગુ કરવામાં આવશે. આ અંગેની વિગતવાર જાહેરાત આગામી વાઈબ્રન્ટ ગુજરાત ગ્લોબલ સમિટ દરમિયાન કરવામાં આવશે. પ્રોજેક્ટ શરૂ કરવામાં 6 થી 7 મહિનાનો સમય લાગી શકે છે.

ઉલ્લેખનીય છે કે, રાજ્ય સરકાર દ્વારા મઝાગોન ડોક શિપયાર્ડ સાથે એમઓયુ પર હસ્તાક્ષર કરવામાં આવ્યો છે. આ પ્રોજેક્ટ દ્વારકા કોરિડોરનો એક ભાગ છે. આ સબમરીન માટે BAT દ્વારકા પાસે એક જેટી બાંધવામાં આવી શકે છે. આ સબમરીન એક સમયે વધુમાં વધુ 24 મુસાફરોને સમાવી શકે છે. તેમાં મેડિકલ કીટ સહિતની તમામ સુવિધાઓ ઉપલબ્ધ હશે.

સબમરીન 100 મીટર ઊંડા પાણીની નીચે જશે - પ્રવાસીઓ સબમરીન દ્વારા દ્વારકાના ઊંડા સમુદ્રના નજારા, દરિયાઈ જીવનને ખૂબ નજીકથી જોઈ શકશે. સબમરીનમાં વીડિયો કોન્ફરન્સિંગ અને કોમ્યુનિકેશન પણ ઉપલબ્ધ રહેશે. આ સબમરીન દરિયામાં 100 મીટર ઊંડે સુધી નીચે જશે. બંને બાજુ બેઠકો હશે અને સળંગ 12 લોકો માટે બેઠક વ્યવસ્થા હશે. દરેક સીટ પર એક બારી હશે, જેથી પ્રવાસીઓ કોઈપણ મુશ્કેલી વિના સમુદ્રનો સંપૂર્ણ નજારો જોઈ શકે અને માણી શકે.

English summary

know special thing about Dwarka submarine project to underwater view