ડિસેમ્બરના પહેલા અઠવાડિયામાં ગુજરાતમાં પડી શકે છે માવઠું, આ વિસ્તારો પર જોખમ વધારે
ગુજરાતમાં કમોસમી વરસાદની સંભાવના વ્યક્ત કરવામાં આવી છે. રાજ્યના હવામાન નિષ્ણાત અંબાલાલ પટેલના અનુમાન મુજબ, નવેમ્બરના અંતથી ડિસેમ્બરના અંત સુધી હવામાનમાં નોંધપાત્ર ફેરફારો જોવા મળી શકે છે. બંગાળના ઉપસાગરમાં ચક્રવાતની શક્યતા અને પશ્ચિમી વિક્ષેપોની અસરને કારણે ઠંડીમાં વધઘટ અને માવઠાના યોગ બનશે.
અંબાલાલ પટેલના જણાવ્યા અનુસાર, નવેમ્બરના છેલ્લા સપ્તાહમાં બંગાળના ઉપસાગરમાં એક ચક્રવાત સક્રિય થઈ શકે છે. જો કે, આ ચક્રવાતની ગુજરાત પર સીધી અસર ઓછી થવાની સંભાવના છે. તેની મુખ્ય અસર દક્ષિણ-પૂર્વ ભારતના વિસ્તારોમાં જોવા મળશે. જો કે, તેની આડઅસરરૂપે ગુજરાતના હવામાનમાં પણ ફેરફાર આવી શકે છે, ખાસ કરીને ઉત્તર ગુજરાતમાં હવામાન પલટો થઈ શકે છે.
હાલ રાજ્યમાં ઠંડીનું પ્રમાણ વધઘટ ભરેલું છે. પરંતુ સૂર્ય દક્ષિણાયન થતાં ઠંડી વધશે. દેશના ઉત્તરીય પર્વતીય પ્રદેશોમાં હળવા પશ્ચિમી વિક્ષેપો શરૂ થવાથી ગુજરાતમાં ઠંડીનું પ્રમાણ વધશે. ડિસેમ્બરના મધ્ય સુધીમાં પશ્ચિમી વિક્ષેપની અસર હેઠળ રાજ્યમાં ઠંડી નોંધપાત્ર રીતે વધવાની શક્યતા છે.
અંબાલાલ પટેલની આગાહી મુજબ, ડિસેમ્બરના બીજા સપ્તાહથી મહિનાના અંત સુધી ગુજરાતના હવામાનમાં મોટો પલટો આવી શકે છે. ડિસેમ્બરના બીજા સપ્તાહમાં ફરી બંગાળના ઉપસાગરમાં હલચલ જોવા મળી શકે છે, જેની અસર ગુજરાતના હવામાન પર પડશે. આ સમયગાળામાં રાજ્યમાં કમોસમી વરસાદ (માવઠું) થવાની સંભાવના છે.
આ માવઠાની અસર રાજ્યના ઘણા ભાગોમાં જોવા મળી શકે છે, જેમાં મુખ્યત્વે ઉત્તર ગુજરાત, મધ્ય ગુજરાત, પંચમહાલ, રાજકોટ, સૌરાષ્ટ્રના કેટલાક વિસ્તારો અને દક્ષિણ ગુજરાતનો સમાવેશ થાય છે. ખેડૂતોએ આ આગાહીને ધ્યાનમાં રાખીને પોતાના પાકને સુરક્ષિત રાખવા માટે જરૂરી તૈયારીઓ કરવી હિતાવહ છે.
આગામી દિવસોમાં રાજ્યના હવામાનમાં ઠંડી, પશ્ચિમી વિક્ષેપ અને માવઠા જેવા પરિબળોને કારણે ઉતાર-ચઢાવ જોવા મળશે.
Click it and Unblock the Notifications
Sign in with Google
