વિશ્વની સૌથી મોટી ગાર્ડન ક્લોક ફરી શરૂ થશે સુરતમાં
સુરત, 13 ઓક્ટોબરઃ સુરત ખાતે વિશ્વની સૌથી મોટી ગાર્ડન ઘડિયાળ આવેલી છે. જેને ભેસ્તાન સ્થિત નવીનચંદ્ર ગાર્ડનમાં બનાવવામાં આવી છે. આ ઘડિયાળ છેલ્લા ઘણા વર્ષોથી બંધ હાલતમાં હતી અને તેને રિપેર કરવાની દરકાર લેવામાં આવી નહોતી પરંતુ હવે જનભાગીદારીથી એ ઘડિયાળને ફરી ફરતી કરવાનું કામ સુરત મહાનગરપાલિકા દ્વારા હાથ ધરવામાં આવ્યું છે. આ ઘડિયાળને ચેન્નાઇ બેઝ્ડ ઇન્ડિયા ક્લોક એન્ડ સાયન્સ દ્વારા બનાવવામાં આવી હતી. કેટલીક કંપનીઓ દ્વારા તેને રિપેર કરવાની જવાબદારી ઉઠાવી હતી, પરંતુ તે થઇ શક્યું નહોતું. હવે આ કામ મોરબીની એક ઘડિયાળ નિર્માતા કંપનીને સોંપવામાં આવ્યું છે.
નોંધનીય છેકે, 2010માં ગુજરાતની ગોલ્ડન જ્યુબિલી વખતે આ ઘડિયાળને ઓપન કરવામાં આવી હતી. આ ઘડિયાળ બેસ્તાન જીઆવ રોડ ખાતે આવેલી છે, જે સ્વિત્ઝરલેન્ડની સૌથી મોટી ગાર્ડન ક્લોક કરતા 2.20 મીટર મોટી છે. સુરત મ્યુનિસિપલ કોર્પોરેશને આ ઘડિયાળને નવીન ફ્લોરિન કંપની દ્વારા આપવામાં આવેલી 93 હજાર સ્કેવર મીટર જમીનમાં બનાવી છે. આ ગાર્ડનને નવિનચંદ્ર મફતલાલ ગાર્ડન નામ આપીને શહેરનું સૌથી મોટું ગાર્ડન બનાવ્યું છે.