ભંડોળ ભેગુ કરવામાં ભાજપ નંબર 1, એક વર્ષમાં એકઠા કર્યા 477 કરોડ રુપિયા, જાણો બીજા પક્ષોની સ્થિતિ
સત્તારુઢ ભારતીય જનતા પાર્ટી(ભાજપ) ભંડોળ ભેગુ કરવામાં સૌથી આગળ છે. જાણો કયા પક્ષ પાસે કેટલી સંપત્તિ છે.
નવી દિલ્લીઃ સત્તારુઢ ભારતીય જનતા પાર્ટી(ભાજપ) ભંડોળ ભેગુ કરવામાં સૌથી આગળ છે. તેની પાસે જાહેર કરેલી 4800 કરોડથી વધુની સંપત્તિ છે. આ ઉપરાંત તેને આખા વર્ષમાં 400 કરોડથી વધુનો ફાળો મળી જાય છે. નાણાકીય વર્ષ 2020-21માં ભાજપને 477.5 કરોડ રુપિયાનો ફાળો મળ્યો જ્યારે વિપક્ષી દળ કોંગ્રેસને 74.50 કરોડ રુપિયા ફાળા તરીકે મળ્યા.
ભાજપ સૌથી અમીર પાર્ટી
આ ખુલાસો ભારતીય ચૂંટણી પંચ દ્વારા કરવામાં આવ્યો છે. ચૂંટણી પંચે રાજકીય પક્ષોના દાન સંબંધિત રિપોર્ટને સાર્વજનિક કર્યો છે. આ અહેવાલ મુજબ ભાજપને વિવિધ એકમો, ચૂંટણી ટ્રસ્ટ અને વ્યક્તિઓ પાસેથી 4,77,54,50,077 રૂપિયાનુ દાન મળ્યુ છે. આ સંદર્ભમાં ભાજપ દ્વારા નાણાકીય વર્ષ 2020-21માં મળેલા દાનનો અહેવાલ 14 માર્ચે કમિશનને સોંપવામાં આવ્યો હતો.
કોંગ્રેસ હવે સ્પર્ધામાં જ નથી રહી
ભંડોળ એકત્ર કરવા ઉપરાંત સંપત્તિના મામલામાં પણ ભાજપ દેશના અન્ય તમામ પક્ષો પર ભારે છે. એવુ કહેવામાં આવ્યુ છે કે ભાજપ પાસે 2019-20માં 4,847 કરોડ રૂપિયાની સંપત્તિ હતી. વળી, હવે 2022 ચાલી રહ્યુ છે અને જો એક હજાર-હજાર કરોડ રૂપિયાનો વધારો માનવામાં આવે તો તે 6 હજાર કરોડ રૂપિયાથી વધુ થાય છે. જે રાજ્યોમાં 2022 પહેલા પણ બીજેપી સત્તામાં હતી ત્યાં આ વર્ષની ચૂંટણીમાં ફરી સત્તા પર આવી.
કોંગ્રેસે કહ્યુ - અમને 74 કરોડ રૂપિયા મળ્યા
2020-21માં મળેલા દાનના અહેવાલને સાર્વજનિક કરતી વખતે ચૂંટણી પંચે કોંગ્રેસ અને અન્ય પક્ષો વિશે પણ માહિતી આપી હતી. કહેવામાં આવ્યુ છે કે કોંગ્રેસને એક વર્ષમાં 74 કરોડ રૂપિયા ડોનેશનમાં મળ્યા છે. તેમની પાસે 2019-20માં 588 કરોડ રૂપિયાની સંપત્તિ હતી. કોંગ્રેસ દ્વારા જ આપવામાં આવેલા સોગંદનામામાં ઉલ્લેખ કરવામાં આવ્યો હતો કે તેને વિવિધ એકમો અને વ્યક્તિઓ પાસેથી 74,50,49,731 રૂપિયાનુ દાન મળ્યુ હતુ.
સંપત્તિ મામલે બસપા બીજા નંબરે
કોંગ્રેસ પછી સપા-બસપા અને દક્ષિણ ભારતીય પક્ષોનો નંબર આવે છે. જ્યારે સંપત્તિની વાત આવે ત્યારે 2019-20માં પણ ભાજપ પ્રથમ, બસપા બીજા અને કોંગ્રેસ ત્રીજા સ્થાને છે. ચૂંટણી અધિનિયમની જોગવાઈઓ અનુસાર, રાજકીય પક્ષોએ 20,000 રૂપિયાથી વધુના દાન સંબંધિત માહિતી આપવી જરૂરી છે.
એડીઆરના રિપોર્ટમાં મોટો ખુલાસો
એસોસિએશન ફોર ડેમોક્રેટિક રિફોર્મ્સ (એડીઆર)એ પણ દાન અંગેનો અહેવાલ બહાર પાડ્યો હતો. તે રિપોર્ટમાં ભાજપ, કોંગ્રેસ, સીપીઆઈએમ, એનસીપી અને ટીએમસી જેવા મોટા પક્ષોનો સમાવેશ કરવામાં આવ્યો હતો. ત્યારે કહેવામાં આવ્યુ- 'ભાજપને એક વર્ષમાં 2025 કોર્પોરેટ-દાતાઓ પાસેથી ₹720.407 કરોડનું દાન મળ્યુ. કોંગ્રેસને 133.04 કરોડનુ દાન મળ્યુ. NCPને ₹57.086 કરોડનુ દાન મળ્યુ.'