નાણામંત્રીએ GST 2.0 રિપોર્ટ કાર્ડ રજૂ કર્યું, તહેવારો દરમિયાન 54 ઉત્પાદનોના ભાવમાં રેકોર્ડ ઘટાડો થયો

GST 2.0 Rate Cut Benefits: ધનતેરસના શુભ અવસર પર આયોજિત "જીએસટી બચત ઉત્સવ" પ્રેસ કોન્ફરન્સમાં નાણામંત્રી નિર્મલા સીતારમણે જાહેરાત કરી કે, GST દરોમાં કરાયેલી તાજેતરની કપાતનો લાભ હવે સીધો સામાન્ય લોકો સુધી પહોંચી રહ્યો છે. તેમણે જણાવ્યું કે, 54 જેટલી જરૂરી વસ્તુઓના ભાવમાં રેકોર્ડ ઘટાડો નોંધાયો છે, જે અપેક્ષા કરતાં પણ વધુ છે.

નાણામંત્રીએ સ્પષ્ટ કર્યું કે સરકાર 54 જેટલી આવશ્યક વસ્તુઓની કિંમતો પર સતત નજર રાખી રહી છે, જેથી ટેક્સ કપાતનો સંપૂર્ણ લાભ ગ્રાહકોને મળી શકે. તેમણે કહ્યું કે GST સુધારાઓથી માત્ર વસ્તુઓ સસ્તી નથી થઈ, પરંતુ બજારમાં માંગ પણ વધી છે, જેનાથી દેશની અર્થવ્યવસ્થાને મજબૂતી મળી છે.

GST સુધારાથી ગ્રાહકોને અપેક્ષાથી વધુ લાભ

નિર્મલા સીતારમણે કહ્યું કે, "કેટલાક ઉત્પાદનો પર અપેક્ષા કરતાં વધુ કરમાં ઘટાડો થયો છે, અને આ ઘટાડાનો ફાયદો ગ્રાહકોને મળ્યો છે. કેટલાક કિસ્સાઓમાં, વેપારીઓએ પણ અપેક્ષા કરતાં વધુ ટેક્સ કપાતનો લાભ ગ્રાહકોને આપ્યો છે." તેમણે જણાવ્યું કે, '#NextGenGST' ના અમલ બાદ શરૂ થયેલા "જીએસટી બચત ઉત્સવ"ને જનતાએ સકારાત્મક રીતે સ્વીકાર્યો છે.

સરકાર દ્વારા મોનિટર કરાઈ રહેલી 54 વસ્તુઓમાંથી દરેક પ્રોડક્ટમાં ગ્રાહકોને ટેક્સ કપાતનો સીધો લાભ મળ્યો છે, અને 5% થી 12% સુધીના ભાવમાં વાસ્તવિક ઘટાડો નોંધાયો છે.

તહેવારોની સિઝનમાં રેકોર્ડ વેચાણ

નાણામંત્રીએ વેચાણના આંકડા રજૂ કરતા જણાવ્યું કે, સપ્ટેમ્બરના છેલ્લા નવ દિવસોમાં દેશભરમાં ખરીદીમાં જબરદસ્ત ઉછાળો જોવા મળ્યો છે.

પેસેન્જર વાહનોની ડિલિવરી: 3.72 લાખ યુનિટ્સ સુધી પહોંચી.
ટુ-વ્હીલરનું વેચાણ: 21.60 લાખ યુનિટ્સ નોંધાયું.
ટીવીનું વેચાણ: રેટ રેશનલાઇઝેશન પછી 30-35% વધ્યું. 85-ઇંચના ટીવીનો સ્ટોક પૂરો થયો.
એર કંડિશનર (AC): વેચાણ લગભગ બમણું થયું.
ઇલેક્ટ્રોનિક્સ: નવરાત્રિ સિઝનમાં ઇલેક્ટ્રોનિક ઉત્પાદનોનું વેચાણ 20-25% વધ્યું.

વાણિજ્ય મંત્રી પિયૂષ ગોયલ

વાણિજ્ય અને ઉદ્યોગ મંત્રી પિયૂષ ગોયલે જણાવ્યું કે, નવી GST પ્રણાલી ('#NextGenGST') 22 સપ્ટેમ્બરથી લાગુ કરવામાં આવી છે, જેણે બજાર અને ઉદ્યોગ જગતમાં નવી ઊર્જાનો સંચાર કર્યો છે. તેમણે કહ્યું કે, "ઇન્ફ્રાસ્ટ્રક્ચરમાં રોકાણ અને કિફાયતી દરોની બેવડી નીતિને કારણે અર્થતંત્રને મોટો વેગ મળ્યો છે. IMF દ્વારા ભારતનો GDP ગ્રોથ રેટ 6.6% સુધી વધારવામાં આવ્યો છે, જે આ સફળતાની સાબિતી છે."

ઇલેક્ટ્રોનિક્સ સેક્ટરમાં તેજી અને ફૂડ ઇન્ફ્લેશનમાં ઘટાડો

આઇટી અને રેલ મંત્રી અશ્વિની વૈષ્ણવે જણાવ્યું કે, ઇલેક્ટ્રોનિક્સ સેક્ટરની માંગ વધવાથી સ્થાનિક ઉત્પાદન અને રોજગારને સીધો ફાયદો થયો છે. આ સેક્ટર હવે 25 લાખ લોકોને રોજગાર આપી રહ્યું છે. તેમણે ઉમેર્યું કે, ખાદ્ય મુદ્રાસ્ફીતિ (Food Inflation) માં 2% જેટલો ઘટાડો થયો છે અને સતત ચાર મહિનાથી ખાદ્ય વસ્તુઓના ભાવોમાં ઘટાડો જોવા મળી રહ્યો છે.

સરકારે અંતમાં કહ્યું કે, વર્ષ 2025 ભારતની ગ્રાહક અર્થવ્યવસ્થા માટે એક ટર્નિંગ પોઇન્ટ બની રહ્યું છે, જ્યાં GST સુધારાઓએ કિંમતો ઘટાડવા સાથે દેશમાં વપરાશ અને ઉત્પાદન બંનેને નવી ગતિ આપી છે.

English summary

Finance Minister Nirmala Sitharaman unveils GST 2.0 benefits, confirming a price drop in 54 products. Record sales in electronics and vehicles this festive season. Read about '#NextGenGST' impact.