આર્થિક સલાહકાર પરિષદની પહેલી બેઠકમાં રોજગાર અંગે ચર્ચા
બુધવારે યોજાઇ હતી આર્થિક સલાહકારની પ્રથમ બેઠક, પીએમ નરેન્દ્ર મોદી પણ ઉપસ્થિત
બુધવારે વડાપ્રધાન નરેન્દ્ર મોદી સાથે પહેલીવાર આર્થિક સલાહકાર બેઠક(EAC-PM) થઇ હતી. આ બેઠક બાદ આર્થિક સલાહકાર પરિષદના ચેરમેન બિબેક દેબરૉયે જણાવ્યું હતું કે, આ બેઠકમાં આર્થિક વિકાસ, રોજગારના મુદ્દે ચર્ચા થઇ હતી. આ સાથે જ અનૌપચારિક ક્ષેત્ર, ફિસ્કલ ફ્રેમવર્ક, મૉનિટરી પોલિસી સહિત 10 મુદ્દાઓને પ્રાથમિકતા મળી હતી. આર્થિક સલાહકાર પરિષદ(EAC-PM)નું ફોકસ આર્થિક વૃદ્ધિને ગતિ આપવા પર તેમજ રોજગાર પર રહેશે. આર્થિક સલાહકાર પરિષદ દ્વારા નાણાંકીય વર્ષ બજેટ 2019ને ધ્યાનમાં રાખીને ભલામણો કરવામાં આવી છે. આ બેઠકમાં નાણાં વિભાગના મુખ્ય આર્થિક સલાહકાર અરવિંદ સુબ્રમણ્યમની સાથે નીતિ આયોગના સભ્ય બિબેક દેબરૉયે પણ ભાગ લીધો હતો. આ બેઠકમાં આર્થિક મામલાના જાણકાર સુરજીત ભલ્લા, રાથિન રૉય, આશિમા ગોયલ અને રતન વટલ પણ હાજર રહ્યા હતા.
25 સપ્ટેમ્બરના રોજ પીએમ મોદી દ્વારા આર્થિક સલાહકાર પરિષદ(EAC-PM)ની રચના કરવામાં આવી હતી. ઉલ્લેખનીય છે કે, મોદી સરકાર સત્તામાં આવ્યાના ત્રણ વર્ષ બાદ એવા સમયે આર્થિક સલાહકાર પરિષદની રચના કરવામાં આવી છે, જ્યારે જીડીપીના દરમાં ઘટાડો નોંધાયો છે. આ વર્ષે એપ્રિલથી જૂનના ત્રણ મહિના દરમિયાન જીડીપી વૃદ્ધિ ઘટીને 5.7 ટકા પર પહોંચી હતી. મે 2014 બાદ આ સૌથી નીચો આંકડો છે. આ મુદ્દે વિપક્ષ તરફથી પણ આકરા પ્રહારો કરવામાં આવી રહ્યા છે. પીએમ મોદી દ્વારા રચાયેલ આર્થિક સલાહકાર પરિષદ(EAC-PM)ની પહેલી બેઠકમાં આ મુદ્દે ગંભીરતાથી વિચાર કરવામાં આવ્યો હતો.
Click it and Unblock the Notifications
Sign in with Google
