સુપ્રીમ કોર્ટે ચૂંટણી બોન્ડ પર તુરંત પ્રતિબંધ મૂકવાનો ઇનકાર કર્યો, ચૂંટણી પંચ પાસે માંગ્યો જવાબ
સુપ્રીમ કોર્ટે તાત્કાલિક અસરથી ચૂંટણી બોન્ડ પર પ્રતિબંધ મૂકવાનો ઇનકાર કરી દીધો છે. સોમવારે સુનાવણી કરતાં સુપ્રીમ કોર્ટે કહ્યું કે, હાલમાં ચૂંટણી બોન્ડ પર કોઈ પ્રતિબંધ રહેશે નહીં.
સુપ્રીમ કોર્ટે તાત્કાલિક અસરથી ચૂંટણી બોન્ડ પર પ્રતિબંધ મૂકવાનો ઇનકાર કરી દીધો છે. સોમવારે સુનાવણી કરતાં સુપ્રીમ કોર્ટે કહ્યું કે, હાલમાં ચૂંટણી બોન્ડ પર કોઈ પ્રતિબંધ રહેશે નહીં. સુપ્રીમ કોર્ટે આ મુદ્દે ચૂંટણી પંચને નોટિસ ફટકારી છે અને બે અઠવાડિયામાં તેનો જવાબ માંગ્યો છે. કોર્ટ બે અઠવાડિયા પછી ફરીથી તેની સુનાવણી કરશે.
ચુંટણી પંચ પાસે બે અઠવાડીયામાં જવાબ માંગ્યો
મુખ્ય ન્યાયાધીશ શરદ બોબડેએ સોમવારે મૌખિક આદેશમાં કહ્યું હતું કે, જો સુપ્રીમ કોર્ટે અગાઉ ચૂંટણી બોન્ડ યોજનાને રોકવા માટે બિનજરૂરી માન્યું હતું, તો પણ કોર્ટ આ યોજના પર પ્રતિબંધ લગાવી શકે નહીં. ચૂંટણી પંચ તરફથી હાજર રહેલા રાકેશ દ્વિવેદીએ આ મામલે જવાબ આપવા માટે કોર્ટ પાસે 4 અઠવાડિયાનો સમય માંગ્યો હતો, પરંતુ સીજેઆઈ બોબડેએ ફક્ત બે અઠવાડિયા આપ્યા હતા.
ગત સુનવણીમાં સુપ્રીમે કર્યો હતો આ આદેશ
ગત સુનાવણીની શરૂઆતમાં, સર્વોચ્ચ અદાલતે તમામ રાજકીય પક્ષોને આદેશ આપ્યો હતો કે ચૂંટણી બોન્ડ દ્વારા કરવામાં આવતા દાન અને દાનીની સંપૂર્ણ વિગતો સીલબંધ પરબિડીયામાં ચૂંટણી પંચને સોંપવામાં આવે. સુપ્રીમ કોર્ટે એસોસિએશન ઓફ ડેમોક્રેટિક રિફોર્મ્સની અરજીની સુનાવણી દરમિયાન આ કહ્યું છે. એડીઆર ઉપરાંત સીપીએમ અને અન્ય અનેક અરજીઓએ ઈલેક્ટોરલ બોન્ડ સ્કીમ 2018 પર સ્ટેની માંગ કરી છે.
અરજદાર તરફથી વકીલ પ્રશાંત ભુષણ રહ્યા હાજર
અરજદાર વતી એડવોકેટ પ્રશાંત ભૂષણએ કહ્યું કે, દરેક ચૂંટણીમાં શાસક પક્ષને મોટા પ્રમાણમાં પૈસા મળી રહે છે, જેનો સ્ત્રોત જણાવવામાં આવતો નથી. ભૂષણે કોર્ટમાં જણાવ્યું હતું કે એસબીઆઈ અને ચૂંટણી પંચે કહ્યું છે કે દરેક ચૂંટણી પહેલા સરકાર ચૂંટણી બોન્ડની યોજના શરૂ કરે છે. હવે દિલ્હીની ચૂંટણી પહેલા પણ સરકાર ચૂંટણી બોન્ડ સાથે આવી હતી. આવા કિસ્સામાં કોર્ટે તેને અટકાવવું જોઈએ.