Winter Update 2024 : ઠંડીની શરૂઆત ક્યારે થશે? જાણો શું કહ્યું હવામાન વિભાગે?

Weather Updates : ચોમાસાની વિદાય બાદ ભારે ગરમી વચ્ચે શિયાળાની રાહ જોવાઈ રહી છે. હવે હવામાન વિભાગે ઠંડીને લઈને મહત્વના સમાચાર આપ્ચા છે.

સામાન્ય રીતે નવેમ્બર મહિનાની શરૂઆતથી વાતાવરણમાં પરિવર્તન શરૂ થઈ જાય છે અને ગરમીમાં ઘટાડો જોવા મળે છે. જો કે આ વખતે ફુલગુલાબી ઠંડી માટે વધારે રાહ જોવી પડી શકે છે.

હવામાન વિભાગનું માનીએ તો આ વખતે નવેમ્બર મહિનામાં ઠંડી પડવાની ઓછી સંભાવના છે. આ વર્ષે ઓક્ટોબર મહિનો ભારતમાં 1901 પછી સૌથી ગરમ રહ્યો છે. સરેરાશ તાપમાન સામાન્ય કરતા 1.23 ડિગ્રી સેલ્સિયસ વધુ નોંધાયું છે.

હવામાન વિભાગ અનુસાર, નવેમ્બરમાં પણ હવામાન ગરમ રહેશે. ભારતીય હવામાન વિભાગના મહાનિર્દેશક મૃત્યુંજય મહાપાત્રાએ મીડિયાને જણાવ્યુ કે, બંગાળની ખાડીમાં કોઈ વેસ્ટર્ન ડિસ્ટર્બન્સ ન હોવાને કારણે અને લો પ્રેશર સિસ્ટમ સક્રિય હોવાને કારણે હવામાન ઠંડુ નથી થઈ રહ્યું. આ જ કારણે નવેમ્બરની શરૂઆત પછી પણ હવામાન ગરમ છે.

તેમણે જણાવ્યું કે, ઓક્ટોબરમાં સરેરાશ તાપમાન 26.92 ડિગ્રી સેલ્સિયસ નોંધાયું છે. આ તાપમાન 1901 પછી દેશમાં સૌથી ગરમ છે. સામાન્ય તાપમાન 25.69 ડિગ્રી સેલ્સિયસ હોય છે. સમગ્ર દેશના સામાન્ય તાપમાન 20.01 ડિગ્રી સેલ્સિયસની સરખામણીમાં લઘુત્તમ તાપમાન પણ 21.85 ડિગ્રી સેલ્સિયસ નોંધાયું છે.

ઠંડીની શરૂઆત વિશે વાત કરતા તેમણે કહ્યું કે, આગામી બે સપ્તાહ સુધી તાપમાનમાં કોઈ ખાસ ઘટાડો નહીં થાય. ઉત્તર-પશ્ચિમ મેદાનોમાં ઓછામાં ઓછા આગામી બે અઠવાડિયા સુધી તાપમાન સામાન્ય કરતા 2 થી 5 ડિગ્રી વધુ રહેશે. આ પછી ધીમે ધીમે તાપમાન ઘટવા લાગશે.

English summary

Winter Update 2024 : When will the cold start? Know what the weather department said?