Surat News: CM ભૂપેન્દ્ર પટેલે 'રાષ્ટ્રીય પુસ્તક મેળો' અને 'ફ્લાવર શો'ને ખુલ્લો મૂક્યો

By Desk

Published: Sunday, February 22, 2026, 16:58 [IST]

Surat News: ડાયમંડ સિટી સુરતમાં આજથી પુસ્તક પ્રેમીઓ અને પ્રકૃતિ પ્રેમીઓ માટે બેવડો ઉત્સવ શરૂ થયો છે. સુરત મહાનગરપાલિકા (SMC) દ્વારા આયોજિત 'સ્વામી વિવેકાનંદ રાષ્ટ્રીય પુસ્તક મેળો' અને 'ફ્લાવર શો'નું રાજ્યના CM ભૂપેન્દ્ર પટેલે આજે વિધિવત ઉદ્ઘાટન કર્યું હતું.

VNSGU કેમ્પસમાં જામશે જ્ઞાનનો મેળો

સુરતીઓની લાંબા સમયની રાહનો અંત આવ્યો છે. કોરોનાકાળ બાદ, એટલે કે પૂરા 5 વર્ષ પછી મહાનગરપાલિકા દ્વારા આ ભવ્ય પુસ્તક મેળાનું પુનઃ આયોજન કરવામાં આવ્યું છે. વીર નર્મદ દક્ષિણ ગુજરાત યુનિવર્સિટી (VNSGU) ના વિશાળ કેમ્પસમાં આયોજિત આ મેળો 22 ફેબ્રુઆરીથી 1 માર્ચ સુધી ચાલશે. પુસ્તક મેળાની સાથે સાથે આકર્ષક ફ્લાવર શોનું પણ આયોજન કરવામાં આવ્યું છે, જે મુલાકાતીઓ માટે મુખ્ય આકર્ષણનું કેન્દ્ર બન્યું છે.

દિગ્ગજ નેતાઓની ઉપસ્થિતિ

આ ઉદ્ઘાટન પ્રસંગે CMની સાથે કેન્દ્રીય જળશક્તિ મંત્રી CR પાટીલ અને રાજ્યના ગૃહમંત્રી હર્ષ સંઘવી પણ ખાસ ઉપસ્થિત રહ્યા હતા. તમામ મહાનુભાવોએ પુસ્તક મેળાના વિવિધ સ્ટોલ્સની મુલાકાત લીધી હતી અને ફ્લાવર શોમાં કરવામાં આવેલી ફૂલોની અદભૂત કલા કૃતિઓને નિહાળી હતી.

શું છે ખાસ?

પુસ્તક મેળો: દેશભરના નામી પબ્લિશર્સ આ મેળામાં ભાગ લઈ રહ્યા છે. સાહિત્ય, વિજ્ઞાન, નવલકથા અને બાળકો માટેના હજારો પુસ્તકો અહીં એક જ સ્થળે ઉપલબ્ધ છે.
ફ્લાવર શો: દેશી અને વિદેશી ફૂલોના વિવિધ ડેકોરેશન અને સેલ્ફી પોઈન્ટ્સ તૈયાર કરવામાં આવ્યા છે, જે શહેરની સુંદરતામાં વધારો કરી રહ્યા છે.
સમયગાળો: આ પ્રદર્શન સતત 8 દિવસ સુધી ચાલશે, જેમાં મોટી સંખ્યામાં શહેરીજનો ઉમટી પડે તેવી શક્યતા છે.

CMનો સંદેશ: આ પ્રસંગે CMએ સુરતીઓને પુસ્તક વાંચન તરફ વળવા અને આ જ્ઞાન ઉત્સવનો વધુમાં વધુ લાભ લેવા પ્રોત્સાહિત કર્યા હતા.

Published On February 22, 2026