ચોંકાવનારો ખુલાસો : બ્રિટનના સાંસદો એડલ્ટ સાઇટ્સ પાછળ દીવાના

Published: Thursday, September 5, 2013, 13:51 [IST]

લંડન, 5 સપ્ટેમ્બર : દેશ દુનિયાના હિતોની વાત કરનારા બ્રિટનના સાંસદો પર બદનામીનો ડાઘ લાગ્યો છે. આ અંગે અન્ય કોઇએ નહીં પણ એક સરકારી દસ્તાવેજે ખુલાસો કર્યો છે. આ દસ્તાવેજ અનુસાર બ્રિટનની સંસદને પોર્ન સાઇટનો ચસકો લાગ્યો છે. આ રિપોર્ટ અનુસાર બ્રિટનની સંસદના પરિસરમાં પોર્ન સાઇટ ખૂબ જોવામાં આવે છે. જ્યારે આ અંગેના આંકડા પર નજર કરવામાં આવી તો ખ્યાલ આવ્યો કે બ્રિટનના સાંસદો એડલ્ટ સાઇટ્સના દીવાના છે. આ અંગેના આંકડાઓએ સૌને હેરાન કરી દીધા.

રિપોર્ટમાં ટાંકવામાં આવેલા આંકડાઓ અનુસાર માત્ર એક જ વર્ષમાં બ્રિટનની સંસદની અંદર 3,00,000 (ત્રણ લાખ)વાર પોર્ન સાઇટ્સને જોવામાં આવી છે. માહિતીનો અધિકાર અંતર્ગત માંગવામાં આવેલી માહિતીમાંથી આ ખુલાસો થયો છે. એક વર્ષની અંદર જ આપવામાં આવેલા આંકડાઓ બાદ આ માહિતી લોકો સમક્ષ બહાર આવી છે.

લંડનના એક અગ્રણી દૈનિક સમાચાર પત્રમાં આ વિગતો પ્રકાશિત કરવામાં આવી છે. જેનો હેતુ બ્રિટનની સંસદની સચ્ચાઇ લોકો સમક્ષ લાવવાનો છે. જો કે આ બાબત હજી સુધી સાબિત થઇ શકી નથી કે પોર્ન સાઇટ્સ બ્રિટનના સાંસદોએ જોઇ છે કે બ્રિટનની સંસદમાં કામ કરતા કર્મચારીઓએ જોઇ છે.

રિપોર્ટમાં કહેવામાં આવ્યું છે કે બ્રિટનની સંસદમાં પાંચ હજારથી વધારે કર્મચારીઓ કામ કરે છે. માહિતીના જણાવ્યા અનુસાર અશ્લીલ વેબસાઇટ્સ સૌથી વધારે વાર ગયા વર્ષે નવેમ્બરમાં જોવામાં આવી હતી. નવેમ્બર મહિનામાં જ 1 લાખ 14 હજાર 844 વાર સાઇટ્સ જોવામાં આવી હતી. જ્યારે મે 2012માં સૌથી ઓછી 2141 લોકોએ આ સાઇટ્સ જોઇ હતી. જ્યારે આ વર્ષના પ્રારંભમાં સૌથી વધારે લોકોએ અશ્લીલ સાઇટ્સ પર ક્લિક કર્યું હતું.

વર્ષ 2013માં એપ્રિલ મહિનામાં સૌથી વધારે 55,552 લોકોએ એડલ્ટ સાઇટ્સ જોઇ હતી. જ્યારે ફેબ્રુઆરીમાં સૌથી ઓછી માત્ર 15 લોકોએ પોર્ન સાઇટ્સ જોઇ હતી. જૂનમાં પણ 397 લોકોએ અશ્લીલ સાઇટ્સ સંસદમાં લાગેલા કોમ્પ્યુટરમાં જોઇ હતી.