એવું તો શું થયું કે આ રાજ્યના 24 જિલ્લાઓમાં ઈન્ટરનેટ બંધ કરી દેવાયું?
આસામની હિમંતા બિસ્વા સરકારે રાજ્યના 35માંથી 24 જિલ્લામાં ઈન્ટરનેટ સેવા બંધ કરવાનો નિર્ણય લીધો છે.
દિસપુર : આસામની હિમંતા બિસ્વા સરકારે રાજ્યના 35માંથી 24 જિલ્લામાં ઈન્ટરનેટ સેવા બંધ કરવાનો નિર્ણય લીધો છે. આસામ સરકારે આ નિર્ણય ગ્રેડ 3 અને ગ્રેડ 4 ની 30,000 જગ્યાઓ માટે લેવામાં આવનારી ભરતી માટેની લેખિત પરીક્ષાને ધ્યાનમાં રાખીને લીધો છે. સરકારી આદેશ મુજબ, સરકારી નોકરીઓ માટે સ્વતંત્ર, ન્યાયી અને પારદર્શક ભરતી પરીક્ષાઓ યોજવા માટે રવિવારે મોબાઇલ ઇન્ટરનેટ કનેક્ટિવિટીને 4 કલાક માટે અસ્થાયી રૂપે સ્થગિત કરવામાં આવી હતી.
નેટબંદી ઉપરાંત, સરકારે લેખિત પરીક્ષાઓ યોજાતી હોય તેવા તમામ જિલ્લાઓમાં કલમ 144 હેઠળ પ્રતિબંધિત આદેશો પણ લાગુ કર્યા છે. 21 ઓગસ્ટ ઉપરાંત સરકારી ભરતી પરીક્ષા 28 ઓગસ્ટ અને 11 સપ્ટેમ્બરે પણ યોજાશે, જેમાં 14 લાખથી વધુ ઉમેદવારો ભાગ લઈ રહ્યા છે. આવી સ્થિતિમાં આસામ સરકારે લેખિત પરીક્ષા દરમિયાન સંભવિત ગેરરીતિઓને રોકવા માટે આ કડક પગલું ભર્યું છે.
રાજ્યના ગૃહ વિભાગ દ્વારા જારી કરાયેલા આદેશમાં 21 અને 28 ઓગસ્ટના રોજ સવારે 10 થી 12 અને બપોરે 2 થી 4 વાગ્યા સુધી મોબાઈલ ઈન્ટરનેટ સેવાઓ સ્થગિત કરવાનું કહેવામાં આવ્યું છે. જો કે આ સમયગાળા દરમિયાન બ્રોડબેન્ડ આધારિત સેવાઓ કાર્યરત રહેશે.
આ અઠવાડિયાની શરૂઆતમાં આસામના મુખ્યમંત્રી હિમંતા બિસ્વા સરમાએ વર્ચ્યુઅલ મીટિંગમાં કહ્યું હતું કે આ માત્ર એક પરીક્ષણ નથી. જો આપણે મેરિટના આધારે 30,000 લોકોને આવરી લઈ શકીએ તો સરકારનો ચહેરો બદલાઈ જશે. સરમાએ કહ્યું કે, અમે કોઈ જોખમ લેવા માંગતા નથી. જો એક વ્યક્તિ પણ પરીક્ષા દરમિયાન વોટ્સએપ પર પ્રશ્નપત્ર લીક કરશે તો પણ અરાજકતા ફેલાશે.