IND vs PAK: વિવાદોને કારણે વ્યુઅરશિપનો પારો ચઢ્યો, શું બનશે વર્લ્ડ રેકોર્ડ? બ્રોડકાસ્ટર્સની થશે ચાંદી!

T20 World Cup 2026 IND vs PAK: ભારત અને પાકિસ્તાન વચ્ચે 15 ફેબ્રુઆરીએ યોજાનારી મેચ પર સૌની નજર ટકેલી છે. અઠવાડિયા સુધી ચાલેલા બહિષ્કારના વિવાદ અને રાજકીય અનિશ્ચિતતા બાદ હવે જ્યારે આ મેચ કોલંબોમાં નક્કી થઈ ગઈ છે, ત્યારે દિગ્ગજોનું માનવું છે કે આટલા ડ્રામા પછી આ મેચ ક્રિકેટ ઈતિહાસની સૌથી મોટી વ્યાવસાયિક ઈવેન્ટ સાબિત થવા જઈ રહી છે.

એક મેચની કિંમત અંદાજે 500 કરોડ રૂપિયા (T20 World Cup 2026 IND vs PAK)

ICCના 2024-27ના બ્રોડકાસ્ટિંગ ચક્રનું મૂલ્ય લગભગ 3 બિલિયન ડોલર છે. આ સોદાની એક મુખ્ય શરત એ છે કે દરેક વૈશ્વિક ટૂર્નામેન્ટમાં ભારત-પાકિસ્તાન વચ્ચે ઓછામાં ઓછી એક મેચ હોવી જોઈએ. એવો અંદાજ છે કે માત્ર આ એક મેચથી જ બ્રોડકાસ્ટિંગ, સ્પોન્સરશિપ અને જાહેરાતો દ્વારા અંદાજે 50થી 60 મિલિયન ડોલરની આવક થાય છે. આ જ કારણ છે કે જ્યારે પાકિસ્તાને બહિષ્કારની ધમકી આપી, ત્યારે શ્રીલંકા સરકાર અને ICCએ આ મેચને બચાવવા માટે પૂરી તાકાત લગાવી દીધી હતી. નાણાકીય જોખમ એટલું મોટું હતું કે તેને નજરઅંદાજ કરવું અશક્ય હતું.

વ્યુઅરશિપનો બની શકે છે વર્લ્ડ રેકોર્ડ?

અત્યાર સુધીની સૌથી વધુ જોવાયેલી ક્રિકેટ મેચ 2011 વનડે વર્લ્ડ કપની ફાઈનલ (558 મિલિયન દર્શકો) છે. જોકે, તાજેતરના ડિજિટલ ટ્રેન્ડ્સ સૂચવે છે કે રવિવારની આ મેચ તે રેકોર્ડ તોડી શકે છે. વર્ષ 2023 વનડે વર્લ્ડ કપ ફાઈનલ દરમિયાન ડિજિટલ પ્લેટફોર્મ પર એક સમયે 5.9 કરોડ લોકો લાઈવ હતા. વર્ષ 2026 ટી-20 વર્લ્ડ કપના શરૂઆતના અઠવાડિયામાં જ વ્યુઅરશિપમાં 2024ની સરખામણીએ 50% નો વધારો જોવા મળ્યો છે.

અબજો દર્શકો સ્ક્રીન સાથે જોડાય તેવી આશા

રાજકીય તણાવ અને બહિષ્કારના ડ્રામાએ આ મેચ પ્રત્યે એવી જિજ્ઞાસા પેદા કરી છે કે જે કદાચ અબજો દર્શકોને સ્ક્રીન સાથે જોડી દેશે. કોલંબોમાં આ મેચને કારણે આર્થિક પ્રવૃત્તિઓમાં ભારે ઉછાળો આવ્યો છે. હોટલો સંપૂર્ણપણે બુક થઈ ગઈ છે અને વિમાન ભાડામાં જબરદસ્ત વધારો થયો છે. સ્થાનિક વેપાર અને પર્યટન માટે આ મેચ કોઈ 'ગોલ્ડન જેકપોટ' થી ઓછી નથી. જાહેરાતોના મોટાભાગના સ્લોટ્સ પહેલેથી જ ઉંચી કિંમતે વેચાઈ ગયા છે અને બાકીના સ્લોટ્સ માટે બ્રાન્ડ્સ વચ્ચે હોડ જામી છે.

English summary

IND vs PAK T20 World Cup 2026: Match Worth ₹2,200 Crore Set to Break All-Time Viewership Records After Boycott Drama