બીજી ટેસ્ટઃ રહાણેની સદી, પહેલી ઇનિંગમાં ભારતના 438

Published: Saturday, February 15, 2014, 10:51 [IST]

વેલિંગ્ટન, 15 ફેબ્રુઆરીઃ વેલિંગ્ટન ટેસ્ટના બીજા દિવસે ન્યુઝીલેન્ડ વિરુદ્ધ ટીમ ઇન્ડિયાનું પલડું ભારે જોવા મળી રહ્યું છે. અજિંક્યા રહાણે(118), શિખ ધવન(98) અને સુકાની મહેન્દ્ર સિંહ ધોની (68)ની શાનદાર બેટિંગની મદદથી ભારતે પહેલી ઇનિંગમાં 438 રન બનાવી લીધા છે. આ સાથે જ ભારતને ન્યુઝીલેન્ડ સામે 246 રનની લીડ મળી ગઇ છે.

બીજા દિવસે ભારતે 2 વિકેટે 100 રનથી આગળ રમવાનું શરૂ કર્યું. ઇશાંત શર્માએ નાઇટવોચમેનની ભૂમિકા અદા કરતા 26 રનની ઇનિંગ રમી હતી. ત્યાર બાદ શિખર ધવન સદી ચૂકતા 98 રન પર સાઉથીની ઓવરમાં આઉટ થયો હતો. શિખર ધવન બાદ અન્ય બેટ્સમેનોની વાત કરવામાં આવે તો, વિરાટ કોહલી 38, મહેન્દ્ર સિંહ ધોની 68, જાડેજા 26, ઝહીર ખાન 22 અને અજિંક્ય રહાણેએ શ્રેષ્ઠ પ્રદર્શન કરતા પહેલી ટેસ્ટ સદી ફટકારતા 118 રન બનાવ્યા હતા. જેમાં તેણે એક છગ્ગો અને 17 ચોગ્ગા ફટકાર્યા હતા.

ન્યુઝીલેન્ડની બોલિંગની વાત કરવામાં આવે તો બીજો દિવસે ન્યુઝીલેન્ડ બોલર્સે વિકેટ મેળવવાની સાથોસાથ રનનો પણ વરસાદ કર્યો હતો. ન્યુઝીલેન્ડ તરફથી બોલ્ટ, સાઉથી અને વેંગરે 3-3 વિકેટ મેળવી હતી, જ્યારે નીશામને એક વિકેટ મળી હતી.

Published On February 15, 2014