IPL 2021 : KKR એ દિલ્હી કેપિટલ્સને 3 વિકેટે હરાવી ફાઇનલમાં જગ્યા બનાવી!

ઇન્ડિયન પ્રીમિયર લીગ 2021 ની બીજી ક્વોલિફાયર મેચ દિલ્હી કેપિટલ્સ અને કોલકાતા નાઇટ રાઇડર્સ વચ્ચે શારજાહમાં રમાઈ હતી. કોલકાતા નાઈટ રાઈડર્સે રોમાંચક મેચમાં દિલ્હી કેપિટલ્સને 3 વિકેટે હરાવી ફાઇનલમાં પ્રવેશ કર્યો હતો.

આ જીતમાં રાહુલ ત્રિપાઠીએ મહત્વની ભૂમિકા ભજવી હતી. KKR ને 2 બોલમાં 6 રનની જરૂર હતી અને તમામ ખેલાડીઓ એક પછી એક આઉટ થઈ ગયા હતા. તે સમયે તેને છેલ્લી ઓવરના પાંચમા બોલ પર છગ્ગો ફટકારીને ત્રીજી વખત કેકેઆરને આઈપીએલની ફાઇનલમાં લઈ ગયો હતો. આ સિવાય વેંકટેશ અય્યરે KKR તરફથી સૌથી વધુ 55 રનની ઇનિંગ રમી હતી.

ટોસ હારીને પહેલા રમતા દિલ્હી કેપિટલ્સે નિર્ધારિત 20 ઓવરમાં 5 વિકેટ ગુમાવીને 135 રન બનાવ્યા હતા. કેકેઆરના બોલરોએ શાનદાર બોલિંગ કરી દિલ્હી કેપિટલ્સના બેટ્સમેનોને બેકફૂટ પર રાખ્યા હતા. શ્રેયસ અય્યરે દિલ્હી માટે 27 બોલમાં અણનમ 30 રનની ઈનિંગ રમી હતી. KKR તરફથી વરુણ ચક્રવર્તીએ 2 વિકેટ લીધી હતી. આ સાથે જ શિવમ માવી અને લોકી ફર્ગ્યુસને પણ એક-એક વિકેટ લીધી હતી.

KKR ત્રીજી વખત IPL ની ફાઇનલમાં પહોંચ્યું છે. અગાઉ 2012 અને 2014 માં KKR એ ગૌતમ ગંભીરના નેતૃત્વમાં IPL નું ટાઇટલ મેળવ્યું હતું.

English summary

IPL 2021: KKR beat Delhi Capitals by 3 wickets to make it to final