IPL-7: કોલકતાએ કર્યો વિજય સાથે આઇપએલનો આગાઝ

અબુ ધાબી, 17 એપ્રિલઃ દુબઇ ખાતે રમાઇ રહેલી આઇપીએલની સાતમી શ્રેણની ઉદ્ઘાટન મેચમાં કોલકતા નાઇટ રાઇડર્સે જેક્સ કાલિસ અને મનીષ પાંડેયની શાનદાર ઇનિંગ તથા સુનીલ નરેનની ઉત્કૃષ્ટ બોલિંગની મદદથી મુંબઇ ઇન્ડિયન્સ સામે 41 રનથી વિજય મેળવ્યો છે. કોલકતા તરફથી આપવામાં આવેલા 164 રનના લક્ષ્યાંકનો પીછો કરી રહેલી મુંબઇ ઇન્ડિયન્સની ટીમ સાત વિકેટ ગુમાવીને માત્ર 122 રન જ બનાવી શક્યું હતું. જેક્સ કાલિસને તેની 72 રનની શાનદાર ઇનિંગ બદલ મેન ઓફ ધ મેચ જાહેર કરવામાં આવ્યો હતો.

ટોસ જીતીને મુંબઇ ઇન્ડિયન્સે કોલકતાને પ્રથમ બેટિંગ કરવાનુ આમંત્રણ આપ્યું હતું. કોલકતા તરફથી ગંભીર શૂન્ય રને આઉટ થતા એક સમયે મુંબઇના સુકાની રોહિત શર્માનો નિર્ણય સાચો લાગી રહ્યો હતો, પરંતુ બાદમાં કાલિસ અને પાંડેયએ 131 રનની ભાગીદારી નોંધાવી મેચ પલટાવી નાંખી હતી. કોલકતા તરફથી જેક્સ કાલિસ 72, મનિષ પાંડેય 64, ઉથપ્પા 1, પઠાણ 4, શાકિબ અલ હસન 1 અને એસ યાદવે 13 રન બનાવ્યા હતા. મુંબઇ તરફથી લસિથ મલિંગાએ ચાર અને ઝહીર ખાને એક વિકેટ મેળવી હતી.

મુંબઇ ઇન્ડિયન્સની બેટિંગ પર નજર ફેરવીએ તો, કોલકતા તરફથી મળેલા 164 રનના લક્ષ્યાંકનો પીછો કરી રહેલી મુંબઇ ઇન્ડિયન્સને પહેલો ઝટકો હસ્સીના રૂપમાં પડ્યો હતો. હસ્સી ત્રણ રન બનાવી આઉટ થયો હતો. હસી ઉપરાંત તારે 24, રાયડૂ 48, રોહિત શર્મા 27, પોલાર્ડ 6, એન્ડરસન 2, હરભજન સિંહ 0 અને ગૌતમે 7 રન બનાવ્યા હતા અને ટીમ નિર્ધારિત 20 ઓવરમાં સાત વિકેટ ગુમાવીને 122 રન બનાવી શકી હતી. કોલકતા તરફથી સુનીલ નરેને ચાર, મોર્કલ, હસન અને ચાવલાએ એક-એક વિકેટ મેળવી હતી.

English summary

Kolkata Knight Riders beat Mumbai Indians by 41 runs in the opening fixture of IPL 7 on Wednesday.