પાકિસ્તાની ઓપનર બાબર આઝમે મેદાન માર્યુ, T20 રેન્કિંગમાં નંબર 1 બેટ્સમેન બન્યો!
UAEમાં રમાઈ રહેલા T20 વર્લ્ડ કપમાં પાકિસ્તાનની ટીમે અત્યાર સુધી શાનદાર પ્રદર્શન કર્યું છે અને નામીબિયા સામે મોટી જીત મેળવીને સેમીફાઈનલમાં જગ્યા બનાવનારી પ્રથમ ટીમ બની ગઈ છે.
UAEમાં રમાઈ રહેલા T20 વર્લ્ડ કપમાં પાકિસ્તાનની ટીમે અત્યાર સુધી શાનદાર પ્રદર્શન કર્યું છે અને નામીબિયા સામે મોટી જીત મેળવીને સેમીફાઈનલમાં જગ્યા બનાવનારી પ્રથમ ટીમ બની ગઈ છે. આ જીતમાં પાકિસ્તાનના કેપ્ટન બાબર આઝમે 70 રનની ઇનિંગ રમીને સ્કોર 189 સુધી પહોંચાડવામાં મહત્વની ભૂમિકા ભજવી હતી. જવાબમાં નામિબિયાની ટીમ માત્ર 143 રન જ બનાવી શકી અને 46 રનથી મેચ હારી ગઈ. આ સાથે બાબર આઝમ (1007) એક વર્ષમાં T20 ફોર્મેટમાં 1000થી વધુ રન બનાવનાર પ્રથમ કેપ્ટન બની ગયો છે. બાબર આઝમની શાનદાર બેટિંગની અસર માત્ર તેની ટીમની જીતમાં જ નહીં પરંતુ આઈસીસી દ્વારા જાહેર કરવામાં આવેલી લેટેસ્ટ ટી20 રેન્કિંગમાં પણ જોવા મળી છે.
વર્લ્ડ કપની પ્રથમ 4 મેચમાં 3 અડધી સદી ફટકારનાર બાબર આઝમ હવે ICC મેન્સ T20 રેન્કિંગમાં પ્રથમ સ્થાને પહોંચી ગયો છે. બાબર આઝમે વર્લ્ડ કપમાં અત્યાર સુધીમાં 66ની એવરેજથી 198 રન બનાવ્યા છે અને આ ટૂર્નામેન્ટમાં સૌથી વધુ રન બનાવનારા બેટ્સમેનોની યાદીમાં તે બીજા સ્થાને છે. બાબર આઝમે 834 રેટિંગ પોઈન્ટ સાથે T20 રેન્કિંગમાં પ્રથમ સ્થાન મેળવ્યું છે, જ્યારે ઈંગ્લેન્ડનો બેટ્સમેન ડેવિડ મલાન 798 રેટિંગ પોઈન્ટ સાથે બીજા સ્થાને છે.
બાબર આઝમ હાલ ICC ODI રેન્કિંગમાં પણ પ્રથમ સ્થાન પર છે. બીજી તરફ T20 ક્રિકેટમાં પોતાની પ્રથમ સદી ફટકારનાર જોસ બટલરને પણ T20 રેન્કિંગમાં ફાયદો થયો છે અને તે 9માં સ્થાને પહોંચી ગયો છે, જ્યારે તેના સાથી ખેલાડી જેસન રોયે સારી ઇનિંગ્સના કારણે 14મું સ્થાન હાંસલ કર્યું છે.
બોલરોની વાત કરીએ તો, શ્રીલંકાના લેગ-સ્પિનર વનિન્દુ હસરંગાએ પ્રથમ સ્થાન મેળવ્યું છે, તેને ઇંગ્લેન્ડ અને દક્ષિણ આફ્રિકા સામે સતત બે મેચમાં 3-3 વિકેટ લીધી હતી. આ રેસમાં હસરંગાએ તબરેઝ શમ્સીને પાછળ છોડી દીધો છે. નોંધનીય છે કે T20 રેન્કિંગમાં સામેલ ટોપ 4 બોલર સ્પિન બોલર છે, જેમાં હસરંગા, તબરેઝ શમ્સી, આદિલ રાશિદ અને રાશિદ ખાનના નામ છે.
આદિલ રાશિદે રશીદ ખાનને પાછળ છોડીને ત્રીજું સ્થાન મેળવવા કારકિર્દીમાં સર્વશ્રેષ્ઠ રેટિંગ (730 પોઈન્ટ) પ્રાપ્ત કર્યો છે. બીજી તરફ દક્ષિણ આફ્રિકાના ફાસ્ટ બોલર એનરિચ નોરખિયાએ 18 સ્થાનની છલાંગ લગાવી 7માં સ્થાન પર કબજો કર્યો છે. બીજી તરફ મોહમ્મદ નબી ઓલરાઉન્ડર રેન્કિંગમાં શાકિબ અલ હસન સાથે સંયુક્ત રીતે પ્રથમ સ્થાન પર છે. તમને જણાવી દઈએ કે બોલિંગ રેન્કિંગમાં કોઈ ભારતીય બોલર સામેલ નથી, જે ટીમની સ્થિતિને પણ દર્શાવે છે.