4 દિવસમાં શેર બજારે 6 લાખ કરોડ રૂપિયા કમાઈ આપ્યા, જાણો આવતા વિકમાં કેવુ રહેશે બજાર?
આ અઠવાડીયામાં શેરબજારમાં મોટો ઉછાળો જોવા મળ્યો છે. શુક્રવારે બજાર રેકોર્ડ ઊંચા સ્તરે બંધ થયું હતું. બજારની તેજીના ચાર દિવસમાં રોકાણકારોની સંપત્તિમાં 6.88 લાખ કરોડનો વધારો થયો છે.
શુક્રવારે સેન્સેક્સ 72,720.96ના સર્વકાલીન હાઈ સ્તરે પહોંચ્યો છે. આ સાથે BSE પર લિસ્ટેડ કંપનીઓનું માર્કેટ કેપિટલાઇઝેશન 373.29 લાખ કરોડ રૂપિયાના રેકોર્ડ સ્તરે પહોંચ્યુ છે.
શુક્રવારે સળંગ ચોથા દિવસે IT શેર્સમાં મોટા ઉછાળાને કારણે BSE નો 30 શેરનો સેન્સેક્સ 847.27 પોઈન્ટ અથવા 1.18 ટકા વધીને 72,568.45ની નવી ટોચે બંધ રહ્યો.
ચાર દિવસમાં BSE બેન્ચમાર્ક 1,213.23 પોઈન્ટ અથવા 1.70 ટકા ઉછળ્યો. આ સમયગાળા દરમિયાન રોકાણકારોની સંપત્તિ 6,88,711.19 કરોડ વધીને વિક્રમી 3,73,29,676.27 કરોડ થઈ. બજારમાં સતત વધારો જોવા મળી રહ્યો છે.
જાણકારો અનુસાર, બજારમાં તેજી જળવાઈ રહી છે. બજારમાં રોકાણકારોની સારી ખરીદી જોવા મળી રહી છે. બજાર આવતા સપ્તાહે લાભ સાથે શરૂ થઈ શકે છે. બજારમાં પ્રારંભિક ઉછાળો જોવા મળી શકે છે.
નિષ્ણાતોના મતે નિફ્ટી ઇન્ડેક્સમાં જોરદાર ઉછાળો જોવા મળ્યો છે. તેણે દૈનિક ચાર્ટ પર મોટો બ્રેકઆઉટ આપ્યો છે અને 21,800ના સ્તરને પાર કરી ગયો છે. જેના કારણે આગામી સમયમાં નિફ્ટીમાં 22 હજાર અને 22 હજાર 200ના સંભવિત લક્ષ્યાંક જોવા મળી શકે છે.
નિષ્ણાતોના મતે IT શેર્સમાં બમ્પર ખરીદી જોવા મળી રહી છે. મ્યુચ્યુઅલ ફંડમાં સતત રોકાણથી બજારને સપોર્ટ મળી રહ્યો છે. ડિસેમ્બર ક્વાર્ટરના પરિણામો બજારનો ભાવિ માર્ગ નક્કી કરવામાં મોટી ભૂમિકા ભજવશે. આવનારા સમયમાં માર્કેટમાં વધારો ચાલુ રહી શકે છે. નિષ્ણાતોના મતે, રોકાણકારો સપોર્ટ લેવલ તરફના કોઈપણ ઘટાડામાં ખરીદીની તકો શોધી શકે છે.
Click it and Unblock the Notifications
Sign in with Google
