LPG ગેસ સિલિન્ડરના ભાવમાં મોટો ઘટાડો, ઈંધણ કંપનીઓએ આપી મોટી રાહત
મોંઘવારીની ચારે તરફથી માર સહન કરી રહેલા લોકો માટે રાહતના સમાચાર છે.
નવી દિલ્લીઃ મોંઘવારીની ચારે તરફથી માર સહન કરી રહેલા લોકો માટે રાહતના સમાચાર છે. એલપીજી સિલિન્ડરના ભાવમાં આજે મોટો ઘટાડો કરવામાં આવ્યો છે. આજથી કૉમર્શિયલ ગેસ સિલિન્ડરના ભાવમાં 135 રૂપિયા પ્રતિ સિલિન્ડરનો ઘટાડો કરવામાં આવ્યો છે. ઈંધણ કંપનીઓએ 19 કિલોગ્રામવાળા કૉમર્શિયલ ગેસ સિલિન્ડના ભાવ 135 રુપિયા ઘટાડ્યા છે. ત્યારબાદ આજથી દિલ્લીમાં કૉમર્શિયલ ગેસ સિલિન્ડર 2219 રૂપિયામાં મળશે કે જે પહેલા 2354 રૂપિયાનુ હતુ. કોલકત્તામાં સિલિન્ડર 2322 રૂપિયા, મુંબઈમાં 2171.50 રૂપિયા અને ચેન્નઈમાં 2373 રૂપિયાનુ સિલિન્ડર મળશે.
તમને જણાવી દઈએ કે 19 મેના રોજ ઘરેલુ ગેસ સિલિન્ડર અને કોમર્શિયલ ગેસ સિલિન્ડરની કિંમતોમાં વધારો કરવામાં આવ્યો હતો. મે મહિનામાં ગેસ સિલિન્ડરના ભાવમાં બે વખત વધારો કરવામાં આવ્યો હતો. 14 કિલોના ઘરેલુ ગેસ સિલિન્ડરની કિંમતમાં 3.50 રૂપિયાનો વધારો કરવામાં આવ્યો છે જ્યારે 19 કિલોના કોમર્શિયલ ગેસ સિલિન્ડરની કિંમતમાં 8 રૂપિયા પ્રતિ સિલિન્ડરનો વધારો કરવામાં આવ્યો છે. એવુ માનવામાં આવતુ હતુ કે આજે 1 જૂને ઈંધણ કંપનીઓ ગેસ સિલિન્ડરની કિંમતમાં સુધારો કરશે. આ વર્ષે આંતરરાષ્ટ્રીય બજારમાં ઈંધણના ભાવમાં ઘણો ઉછાળો આવ્યો છે. પેટ્રોલ, ડીઝલ અને એટીએફની સાથે એલપીજીની કિંમતમાં પણ વધારો થયો છે.
આંતરરાષ્ટ્રીય બજારમાં વધતી કિંમતો વચ્ચે એવું માનવામાં આવી રહ્યુ હતુ કે આજે એલપીજી ગેસના ભાવમાં વધારો થઈ શકે છે પરંતુ એવુ થયુ નહિ. ઈંધણ કંપનીઓ મહિનામાં બે વખત એલપીજી ગેસ સિલિન્ડરના ભાવમાં ફેરફાર કરે છે. પ્રથમ ફેરફાર મહિનાની શરૂઆતમાં થાય છે જ્યારે બીજો ફેરફાર મહિનાની મધ્યમાં થાય છે.