રેકૉર્ડ-બ્રેકર પોસ્ટરનું અનાવરણ કરશે બૉસ અક્ષય
મુંબઈ, 14 ઑક્ટોબર : બૉલીવુડ અભિનેતા અક્ષય કુમાર મંગળવારે મુંબઈમાં પોતાની ફિલ્મ બૉસના પોસ્ટરનું અનાવરણ કરશે. આ કોઈ પણ ફિલ્મનું સૌથી મોટુ પોસ્ટર છે કે જેણે માયકલ જૅક્સનનો રેકૉર્ડ તોડ્યો છે.
બૉસ ફિલ્મના આ પોસ્ટરની પહોળાઈ 193 ફુટ ને 1 ઇંચ, જ્યારે લંબાઈ 180 ફુટ ને 2 ઇંચ છે. અક્ષયના ફૅન્સના જૂથ અક્ષય ટીમે આ પોસ્ટર બનાવ્યું છે. ગત 3જી ઑક્ટોબરના રોજ બ્રિટનના લિટલ ગ્રૅંસ્ડેન ઍરફીલ્ડ ખાતે આ પોસ્ટરનું અનાવરણ થયું. આ પોસ્ટર બનાવતા ચાર માસનો સમય લાગ્યો. બૉસ ફિલ્મના આ પોસ્ટરે પૉપ સ્ટાર માયકલ જૅક્સનની ડૉક્યુમેંટરી ફિલ્મ ધિસ ઇઝ ઇટનો રેકૉર્ડ તોડ્યો છે.
અક્ષય કુમાર આવતીકાલે અંધેરી સ્પોર્ટ્સ કૉમ્પ્લેક્સ ખાતે પોતાના ફૅન્સની હાજરીમાં આ ખાસ પોસ્ટરનું અનાવરણ કરશે. અક્ષયે જણાવ્યું - આ સન્માનની બાબત છે. હું તેવી દરેક વ્યક્તિનો આભાર વ્યક્ત કરવા માંગુ છુ કે જેણે આ શક્ય બનાવ્યું. બૉસ ફિલ્મ આગામી બુધવારે રિલીઝ થવાની છે અને તેના દિગ્દર્શક એંથૉની ડિસૂઝા છે.