અમેરિકાએ હુમલા તેજ કર્યા, 30 નાગરિકોના મોતથી ઈરાન લાલચોળ, ખાડીમાંથી એનર્જી એક્સપોર્ટ રોકવાની આપી ધમકી

US Strikes on Iran: ઈરાન અને અમેરિકા વચ્ચે તણાવ સતત વધી રહ્યો છે. અમેરિકાએ ઈરાન પર હુમલા તેજ કરી દીધા છે. ઈરાનના સ્વાસ્થ્ય મંત્રીએ દાવો કર્યો છે કે તાજેતરના અમેરિકી હુમલાઓમાં 30 થી વધુ સામાન્ય નાગરિકોના મોત થયા છે અને 260 થી વધુ લોકો ઘાયલ થયા છે.

સ્વાસ્થ્ય મંત્રાલયના પ્રવક્તા હુસૈન કેરમાનપુરે બુધવારે આ માહિતી આપી હતી. ઘાયલોમાં ત્રણ મહિલાઓ અને છ બાળકો સામેલ છે. કેરમાનપુરે એ પણ જણાવ્યું કે 222 લોકોની સારવાર કરવામાં આવી અને તેમને હોસ્પિટલમાંથી રજા આપી દેવામાં આવી છે. તો બીજી તરફ આ તાજેતરના હુમલાઓ બાદ ઈરાને ખાડી ક્ષેત્રમાંથી ઉર્જા નિકાસ (એનર્જી એક્સપોર્ટ) રોકવાની ધમકી આપી છે.

બુધવારે ઈરાન સરકારના પ્રવક્તા ફાતમેહ મોહાજેરાનીએ સોશિયલ મીડિયા પ્લેટફોર્મ X પર એક પોસ્ટમાં મૃતકોના પરિવારો પ્રત્યે સંવેદના વ્યક્ત કરી અને ભરોસો આપ્યો કે સરકાર પૂરી તાકાત સાથે નાગરિકોની સાથે ઉભી રહેશે.

બેરકને અમેરિકી સેનાએ બનાવી નિશાન, 7 ઈરાની સૈનિકોના મોત

ઈરાની અધિકારીઓના જણાવ્યા અનુસાર, અમેરિકી હુમલાઓમાં ઈરાનની સેનાની એક બેરકને નિશાન બનાવવામાં આવી, જેમાં ઓછામાં ઓછા સાત સૈનિકો માર્યા ગયા અને દેશભરમાં 260 થી વધુ લોકો ઘાયલ થયા. અમેરિકાએ આ તાજેતરના હુમલા ઈરાન દ્વારા હોર્મુઝની સામુદ્રધુની (Strait of Hormuz) માંથી પસાર થવાનો પ્રયાસ કરી રહેલા જહાજોને નિશાન બનાવવામાં આવ્યા બાદ કર્યા છે.

અમેરિકી નૌસેનાએ ફરી શરૂ કરી ઘેરાબંધી

તો બીજી તરફ અમેરિકાએ હોર્મુઝમાં પોતાની નૌસૈનિક ઘેરાબંધી ફરીથી શરૂ કરી દીધી છે. યાદ રહે કે થોડા અઠવાડિયા પહેલા જ અમેરિકા અને ઈરાન વચ્ચે શાંતિ પુનઃસ્થાપિત કરવા માટે વચગાળાની સમજૂતી થઈ હતી જે અંતર્ગત અમેરિકાએ નૌસૈનિક ઘેરાબંધી હટાવી લીધી હતી. આ સિવાય ઈરાનના પરમાણુ કાર્યક્રમ સહિત અન્ય મુદ્દાઓ પર વાતચીત કરીને ઉકેલ શોધવા માટે બંને દેશો વચ્ચે 60 દિવસનો ટકરાવ રોકી દેવામાં આવ્યો હતો.

ઈરાને ખાડીમાંથી એનર્જી એક્સપોર્ટ રોકવાની ધમકી આપી

અમેરિકા અને ઈરાન વચ્ચે બદથી બદતર થઈ રહેલી સ્થિતિ વચ્ચે ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC) એ બુધવારે અમેરિકાને ચેતવણી આપી કે જો નાકાબંધી ચાલુ રહેશે, તો તે મિડલ ઈસ્ટથી થનારા તમામ એનર્જી એક્સપોર્ટને રોકી શકે છે. IRGC એ કહ્યું, "આ વિસ્તારમાંથી તેલ અને ગેસનું એક્સપોર્ટ કાં તો બધા માટે થશે અથવા પછી કોઈના માટે નહીં."