ગુજરાત ATSની વધુ મોટી કાર્યવાહી, જૈશ-એ-મોહમ્મદના વધુ 5 શંકાસ્પદ આતંકીની ધરપકડ

અમદાવાદ: ગુજરાત ATSએ આતંકવાદ વિરોધી કાર્યવાહી દરમિયાન વધુ 5 શંકાસ્પદ આતંકીની ધરપકડ કરી છે. આ તમામ પાકિસ્તાન સ્થિત પ્રતિબંધિત આતંકવાદી સંગઠન જૈશ-એ-મોહમ્મદ (JeM) સાથે જોડાયેલા હોવાનું પ્રાથમિક તપાસમાં સામે આવ્યું છે.

ATSએ આ પહેલાં 3 જુલાઈએ 8 શંકાસ્પદ આતંકીની ધરપકડ કરી હતી. તેમની પૂછપરછ દરમિયાન વધુ 5 લોકોના નામ સામે આવ્યા હતા. તેના આધારે તપાસ આગળ વધારીને હવે આ પાંચેયની ધરપકડ કરવામાં આવી છે. તમામ આરોપીઓ ગુજરાતના અલગ-અલગ જિલ્લાઓના રહેવાસી છે.

તપાસમાં સામે આવ્યું છે કે નવા ઝડપાયેલા પાંચેય આરોપીઓ અગાઉ ધરપકડ કરાયેલા 8 લોકોના સંપર્કમાં હતા. તેઓ એકસાથે વિસ્ફોટક સામગ્રીનું પરીક્ષણ (ટેસ્ટિંગ) પણ કરી રહ્યા હતા. હાલ તમામ આરોપીઓને ATS કસ્ટડીમાં રાખીને પૂછપરછ કરવામાં આવી રહી છે.

3 જુલાઈએ 8 લોકો ઝડપાયા હતા

3 જુલાઈએ ગુજરાત ATSએ ગુજરાત અને મધ્યપ્રદેશમાં એકસાથે ઓપરેશન ચલાવી 8 શંકાસ્પદ આતંકીની ધરપકડ કરી હતી. તપાસ મુજબ આ લોકો જૈશ-એ-મોહમ્મદ માટે કામ કરી રહ્યા હતા અને ગુજરાતમાં સંગઠનનું નેટવર્ક મજબૂત બનાવવાનો પ્રયાસ કરી રહ્યા હતા.

આ ઓપરેશન માટે ATSએ પાંચ અલગ-અલગ ટીમો બનાવી હતી. ત્યારબાદ બનાસકાંઠા, મહેસાણા, નવસારી, પાટણ અને મધ્યપ્રદેશના દેવાસમાંથી કુલ 8 લોકોની ધરપકડ કરવામાં આવી હતી.

પાકિસ્તાની હેન્ડલરના સંપર્કમાં હોવાનો આરોપ

ATSના જણાવ્યા મુજબ તપાસ દરમિયાન જાણવા મળ્યું હતું કે આરોપીઓ પાકિસ્તાનમાં બેઠેલા હેન્ડલરના સંપર્કમાં હતા અને તેમના સૂચનો પ્રમાણે કામ કરી રહ્યા હતા. હવે વધુ 5 લોકોની ધરપકડ બાદ સમગ્ર નેટવર્ક અને અન્ય સંભવિત જોડાણોની તપાસ વધુ તેજ કરવામાં આવી છે.