PM મોદી આજે 75 અમૃત ભારત રેલવે સ્ટેશનોનું કરશે લોકાર્પણ, 1,570 કરોડના ખર્ચે તૈયાર થયા આધુનિક સ્ટેશનો

નવી દિલ્હી: દેશના રેલવે ઇન્ફ્રાસ્ટ્રક્ચરને આધુનિક બનાવવા માટે આજે મહત્વનો દિવસ છે. વડાપ્રધાન નરેન્દ્ર મોદી શુક્રવારે પંજાબના જાલંધરથી વીડિયો કોન્ફરન્સિંગ દ્વારા દેશભરના 75 અમૃત ભારત રેલવે સ્ટેશનોનું લોકાર્પણ કરશે. આ સ્ટેશનોમાં મહારાષ્ટ્રના બારામતી રેલવે સ્ટેશનનો પણ સમાવેશ થાય છે.

કેન્દ્ર સરકારની અમૃત ભારત સ્ટેશન યોજના હેઠળ આશરે ₹1,570 કરોડના ખર્ચે આ સ્ટેશનોનું આધુનિકીકરણ કરવામાં આવ્યું છે. મુસાફરોને વધુ સારી સુવિધાઓ મળે અને રેલવે સ્ટેશનોને આધુનિક સ્વરૂપ મળે તે હેતુથી આ વિકાસકાર્ય હાથ ધરાયું છે.

સ્ટેશનોમાં મળશે આધુનિક સુવિધાઓ

અપગ્રેડ કરાયેલા સ્ટેશનોમાં આધુનિક ડિઝાઇનવાળી ઇમારતો, વધુ સારી લાઇટિંગ, સ્પષ્ટ સાઇનેજ, વિશાળ વેઇટિંગ એરિયા, સ્વચ્છતા માટે અદ્યતન વ્યવસ્થા, દિવ્યાંગ મુસાફરો માટે બેરિયર-ફ્રી પ્રવેશ, સ્વચ્છ વેઇટિંગ રૂમ અને ટોયલેટ તેમજ સુવિધાસભર પાર્કિંગની વ્યવસ્થા કરવામાં આવી છે.

શું છે અમૃત ભારત સ્ટેશન યોજના?

અમૃત ભારત સ્ટેશન યોજના ભારતીય રેલવેની એક મહત્ત્વાકાંક્ષી યોજના છે, જેની શરૂઆત ડિસેમ્બર 2022માં રેલવે મંત્રાલયે કરી હતી. આ યોજનાનો હેતુ દેશભરના 1,275 રેલવે સ્ટેશનોનું તબક્કાવાર આધુનિકીકરણ કરવાનો છે.

આ પ્રોજેક્ટમાં ગતિ શક્તિ યુનિટ્સ, રેલ લેન્ડ ડેવલપમેન્ટ ઓથોરિટી (RLDA) અને રેલવેના વિવિધ બાંધકામ વિભાગો મળીને કામગીરી કરી રહ્યા છે. યોજનાનો મુખ્ય ઉદ્દેશ મુસાફરોની સુવિધામાં વધારો, સ્ટેશન સુધી સરળ પહોંચ અને આધુનિક તથા ટકાઉ રેલવે ઇન્ફ્રાસ્ટ્રક્ચરનું નિર્માણ કરવાનો છે.

આ યોજના હેઠળ દિલ્હી, પંજાબ, હરિયાણા, ઉત્તર પ્રદેશ, ઉત્તરાખંડ, હિમાચલ પ્રદેશ અને કેન્દ્રશાસિત પ્રદેશ જમ્મુ-કાશ્મીર સહિત દેશના વિવિધ રાજ્યોમાં રેલવે સ્ટેશનોને નવા સ્વરૂપમાં વિકસાવવામાં આવી રહ્યા છે.