4 વર્ષ પછી મોટા પડદે એન્ટ્રી કરશે રણબીર કપૂર, જુલાઈ મહિનામાં રિલીઝ થશે આ ફિલ્મો

જુલાઇ મહિનો આવી ગયો છે. વરસાદને કારણે જુલાઇનું વાતાવરણ વધુ ખુશનુમા બની રહે છે. આવી સ્થિતિમાં ફિલ્મ અને પોપકોર્ન ભેગા થાય તો શું વાંધો છે. જો તમે પણ કંઈક આવું જ વિચારી રહ્યા હોવ તો આજે અમે તમને એવી ફિલ્મોની યાદી જણાવીશું.

Published: Friday, July 1, 2022, 16:23 [IST]

જુલાઇ મહિનો આવી ગયો છે. વરસાદને કારણે જુલાઇનું વાતાવરણ વધુ ખુશનુમા બની રહે છે. આવી સ્થિતિમાં ફિલ્મ અને પોપકોર્ન ભેગા થાય તો શું વાંધો છે. જો તમે પણ કંઈક આવું જ વિચારી રહ્યા હોવ તો આજે અમે તમને એવી ફિલ્મોની યાદી જણાવીશું, જે આ મહિનામાં મોટા પડદા પર રિલીઝ થઈ રહી છે.

રાષ્ટ્ર કવચ ઓમ :

આદિત્ય રોય કપૂર, સંજના સાંઘી સ્ટારર ફિલ્મ 'રાષ્ટ્ર કવચઃ ઓમ' મહિનાના પહેલા દિવસે એટલે કે 1 જુલાઈએ રિલીઝ થઈ રહી છે. આ ફિલ્મમાં આદિત્ય રોય કપૂરે જોરદાર એક્શન સીન્સ આપ્યા છે.

જોકે આ ફિલ્મનું વધુ પ્રમોશન કરવામાં આવ્યું નથી. પરંતુ જો તમે આદિત્યના ફેન છો, તો તમે તમારા નજીકના થિયેટરોમાં જઈને આ ફિલ્મનો આનંદ લઈ શકો છો.

ખુદા હાફિઝ ચેપ્ટર 2 :

એક્શન હીરોની વાત કરવામાં આવે તો વિદ્યુત જામવાલનું નામ સૌથી ઉપર આવે છે. જો તમે વિદ્યુતના એક્શન સીન્સના દીવાના છો, તો ઉલ્લેખનીય છે કે, તેની ફિલ્મ 'ખુદા હાફિઝ ચેપ્ટર 2' 8મી જુલાઈના રોજ સિનેમાઘરોમાં રિલીઝ થઈ રહી છે. આ ફિલ્મનો પહેલો ભાગ OTT પ્લેટફોર્મ પર રિલીઝ કરવામાં આવ્યો હતો.

શાબાશ મીતું :

તાપસી પન્નુની જે ફિલ્મની લોકો આતુરતાથી રાહ જોઈ રહ્યા હતા, તે ફિલ્મ આ મહિને રિલીઝ થવા જઈ રહી છે. તાપસી પન્નુ અભિનીત ફિલ્મ 'શાબાશ મીતું' 15 જુલાઈના રોજ સિનેમાઘરોમાં રિલીઝ થવાની છે. ઉલ્લેખનીય છે કે, આ ફિલ્મ મહિલા ક્રિકેટર મિતાલી રાજની બાયોપિક છે. આ ફિલ્મ માટે તાપસીએ પણ ઘણી મહેનત કરી છે.

હિટ :

બોલીવુડમાં વધુ એક દક્ષિણ ભારતીય ફિલ્મની રિમેક બની છે, જેનું નામ છે 'હિટ'. આ ફિલ્મમાં રાજકુમાર રાવ અને સાન્યા મલ્હોત્રા મહત્વના રોલમાં જોવા મળશે. આ ફિલ્મ 'હિટ' 15 જુલાઈએ સિનેમાઘરોમાં રિલીઝ થઈ રહી છે. જ્યારે આ ફિલ્મનું ટ્રેલર બહાર આવ્યું, ત્યારે આ ફિલ્મ પાસેથી લોકોની અપેક્ષાઓ વધી ગઈ હતી.

શમશેરા :

આ ફિલ્મ દ્વારા રણબીર કપૂર ચાર વર્ષ પછી લોકોનું મનોરંજન કરવા આવી રહ્યો છે. ચાહકો લાંબા સમયથી રણબીર કપૂર, વાણી કપૂર અને સંજય દત્તની ફિલ્મ 'શમશેરા'ની આતુરતાથી રાહ જોઈ રહ્યા હતા. આ ફિલ્મ 22 જુલાઈના રોજ સિનેમાઘરોમાં રિલીઝ થઈ રહી છે.

એક વિલન રિટર્ન્સ :

ફિલ્મ 'એક વિલન' જેણે લોકોને ખૂબ ડરાવ્યા હતા. ફરી એકવાર આ ફિલ્મ લોકોને ડરાવવા આવી રહી છે. જ્હોન અબ્રાહમ, અર્જુન કપૂર, દિશા પટાની અને તારા સુતારિયા અભિનીત ફિલ્મ 'એક વિલન રિટર્ન્સ' 29 જુલાઈના રોજ સિનેમાઘરોમાં આવવાની છે. આ ફિલ્મ વર્ષ 2014માં આવેલી 'એક વિલન'ની સિક્વલ છે.

Published On July 1, 2022