'હસીના પાર્કર'નું ધમાકેદાર ટ્રેલર, પરંતુ ટ્વીટર પર થયો વિરોધ!

શ્રદ્ધા કપૂરની આગામી ફિલ્મ 'હસીના પાર્કર'નું પહેલું ટ્રેલર મંગળવારે લોન્ચ કરવામાં આવ્યું હતું. જો કે, ટ્વીટર પર કેટલાક લોકોએ આ ફિલ્મના વિષય અંગે નારાજગી વ્યક્ત કરી હતી.

By Shachi

Updated: Tuesday, July 18, 2017, 17:03 [IST]

અત્યાર સુધી શ્રદ્ધા કપૂરે બોલિવૂડમાં માત્ર કોલેજ ગોઇંગ હસતી-રમતી યુવતીનું જ પાત્ર ભજવ્યું છે. આથી જ જ્યારે દાઉદ ઇબ્રાહિમની બહેન હસીના પાર્કર પર બની રહેલ ફિલ્મમાં શ્રદ્ધા કપૂરનું નામ ફાઇનલ થયું ત્યારથી લોકોને આ ફિલ્મ જોવાનો ખૂબ ઉત્સાહ હતો. શ્રદ્ધાની આ ફિલ્મ 'હસીના પાર્કર'નું પ્રથમ ટ્રેલર લોન્ચ થઇ ગયું છે.

હસીના પાર્કર

મંગળવારે બપોરે આ ફિલ્મનું પ્રથમ ટ્રેલર લોન્ચ કરવામાં આવ્યું હતું. આ ફિલ્મમાં હસીના પાર્કરની નાની યુવતીથી માંડીને નાગપાડાની ગોડમધર બનવા સુધીની સફર દર્શાવવામાં આવી છે. ફિલ્મમાં શ્રદ્ધાનો લૂક અને તેના પોસ્ટરને ખૂબ વાહવાહી મળી હતી. એ જ પ્રમાણે ફિલ્મનું ટ્રેલર પણ લોકોનું ધ્યાન ખેંચવામાં સફળ રહ્યું છે.

તદ્દન નવો છે આવતાર

આ ફિલ્મમાં શ્રદ્ધા તદ્દન અલગ અને નવા અવતારમાં જોવા મળશે. આ પહેલાં મોટા પડદે ક્યારેય શ્રદ્ધાનો આ અવતાર જોવા નથી મળ્યો. ટ્રેલરમાં પણ અમુક સિન અને ડાયલોગને છોડીને શ્રદ્ધા પોતાની છાપ છોડવામાં સફળ રહી છે.

સિદ્ધાંત કપૂર

વધુ રસપ્રદ વાત એ છે કે, શ્રદ્ધાનો જ સગો ભાઇ સિદ્ધાંત આ ફિલ્મમાં દાઉદ ઇબ્રાહિમનો રોલ કરી રહ્યો છે. આ અંગે વાત કરતાં સિદ્ધાંતે જણાવ્યું હતું કે, આ ફિલ્મના રોલ માટે તેણે એક વર્ષ તૈયારી કરી હતી.

સોનાક્ષી સિન્હા હતી પ્રથમ પસંદ

ટ્રેલર લોન્ચ ઇવેન્ટ પર ડાયરેક્યર અપૂર્વ લાખિયાએ જણાવ્યું કે, આ ફિલ્મ માટે પહેલા સોનાક્ષી સિન્હાને અપ્રોચ કરવામાં આવી હતી. પરંતુ તારીખો ન મળતાં આખરે શ્રદ્ધા પર પસંદગી ઉતારી. આ ફિલ્મમાં શ્રદ્ધાએ 17 વર્ષથી લઇને 40 વર્ષ સુધીની મહિલાનો રોલ ભજવ્યો છે.

ટ્વીટર પર વિરોધ

એક બાજુ લોકોને આ ટ્રેલર અને ફિલ્મમાં શ્રદ્ધાનો દમદાર રોલ પસંદ પડી રહ્યો છે, ત્યાં બીજી તરફ ટ્વીટર પર કેટલાક લોકો આ ફિલ્મનો વિરોધ પણ કરી રહ્યાં છે. વિરોધ પાછળનું કારણ છે, હસીના પાર્કર. લોકોનું કહેવું છે કે, આવી ફિલ્મો દ્વારા માફિયા વર્લ્ડને ગ્લોરીફાય કરવું યોગ્ય નથી.