હૃતિક રોશન 15મી નવેમ્બર બાદ કરશે બૅંગ બૅંગ
મુંબઈ, 17 ઑગસ્ટ : ફિલ્મ અભિનેતા હૃતિક રોશનને તબીબોએ સલાહ આપી છે કે તેમણે 15મી નવેમ્બર સુધી આરામ કરવો જોઇએ કે જેથી આગામી પ્રોજેક્ટોમાં તેઓ 15મી નવેમ્બર પછી જ કામ કરી શકશે. જોકે તેમની ક્રિશ 3 ફિલ્મ 4થી નવેમ્બરે જ રિલીઝ થશે.
આ અંગે હૃતિક રોશનનું કહે છે - હું હાલ ઠીક છું અને ઘરે આરામ કરી રહ્યો છું. હું બૅંગ બૅંગ ફિલ્મનું શૂટિંગ નવેમ્બર મધ્યથી શરૂ કરીશ અને તેના માટે ખૂબ જ એક્સાઇટેડ છું. બૅંગ બૅંગનું શૂટિંગ ક્રિશ 3 બાદ જ પ્રસ્તાવિત હતું, પણ હૃતિક રોશનની બ્રેન સર્જરી થવાના કારણે શૂટિંગ થોડાંક દિવસ માટે ટાળી દેવામાં આવી છે. આ ફિલ્મમાં હૃતિક રોશન સાથે કૅટરીના કૈફ છે. કૅટ સાથે હૃતિકની આ બીજી ફિલ્મ હશે.
અગાઉ આ જોડી ઝિંદગી ના મિલેગી દોબારા ફિલ્મમાં પહેલી વાર આવી હતી. બૅંગ બૅંગ ફિલ્મમાં હૃતિક રોશન અને કૅટરીના કૈફ ઉપરાંત ડૅની તેમજ જાવેદ જાફરી પણ છે. કહે છે કે આ ફિલ્મ હૉલીવુડ મૂવી નાઇટ એન્ડ ડે ઉપર આધારિત છે કે જેમાં ટૉમ ક્રૂઝ તથા કૅમરૂન ડિયાઝ મુખ્ય ભૂમિકામાં હતાં. બૅંગ બૅંગ ફિલ્મનું દિગ્દર્શન સિદ્ધાર્થ આનંદ કરી રહ્યાં છે.
નોંધનીય છે કે બ્રેન સર્જરી બાદ તાજેતરમાં જ હૃતિક રોશન પોતાની આવનાર ક્રિશ 3 ફિલ્મના ઈવેંટમાં દેખાયા હતાં.