માત્ર સેક્સની ગાથા નથી મર્ડર 3 : અદિતી રાવ હૈદરી
મુંબઈ, 31 જાન્યુઆરી : મર્ડર 3 માત્ર સેક્સની ગાથા નથી, પણ તે એક નવી વાર્તા અને નવી વિચારસરણીને જન્મ આપનાર દમદાર ફિલ્મ છે. તેને દર્શકો જરૂર પસંદ કરશે. મલ્ટી રિલેશન સેક્સની વાત જરૂર આ ફિલ્મ કરે છે, પરંતુ આ ઉપરાંત પણ ફિલ્મમાં ઘણુ બધુ છે કે જે લોકોને જરૂર સારૂં લાગશે. હવે ફિલ્મનો વિષય એટલો બોલ્ડ છે, તો સ્વાભાવિક છે ફિલ્મમાં બોલ્ડ દૃશ્યો પણ હશે, પરંતુ છતાંય ફિલ્મ ખૂબ રોમાંચક અને રસપ્રદ છે.
આમ કહેવું છે ફિલ્મના અભિનેત્રી અદિતી રાવ હૈદરીનું કે જેઓ હાલ ફિલ્મના પ્રમોશનમાં વ્યસ્ત છે. મર્ડર 3 અંગે આજે યોજાયેલ પ્રેસ કૉન્ફરંસ દરમિયાન અદિતીએ જણાવ્યું કે ફિલ્મ તેમના માટે ખૂબ જ ખાસ છે અને તેઓ તેને લઈને ઉત્સાહિત પણ છે. એવું જ કંઈક કહેવું છે ફિલ્મના દિગ્દર્શક વિશેષ ભટ્ટનું પણ. પ્રથમ વાર ફિલ્મનું દિગ્દર્શન કરતાં વિશેષ જણાવ્યું કે ફિલ્મની વાર્તા એટલી સારી છે કે જેથી તેઓ દિગ્દર્શન કરવા પ્રેરાયાં. ફિલ્મ 14મી ફેબ્રુઆરીના રોજ રિલીઝ થવાની છે.
ફિલ્મમાં લીડ રોલ રણદીપ હુડા, અદિતી રાવ હૈદરી, મોના લીઝા તથા પાકિસ્તાની અભિનેત્રી સારા લૉરેન પણ છે. ફિલ્મની ચર્ચા બોલ્ડ દૃશ્યોના કારણે છે. કહે છે કે રણદીપે આ ફિલ્મમાં ઇંટીમેટ સીન્સની બાબતમાં ઇમરાન હાશમીને પણ મ્હાત કર્યાં છે. જોકે મહેશ ભટ્ટ અગાઉ જ કહી ચુક્યાં છે કે મર્ડર 3 ફિલ્મ મલ્ટી સેક્સ રિલેશનની હિમાયત કરે છે. તેમનો દાવો છે કે આ ફિલ્મ લોકોની વિચારસરણી બદલવામાં મદદ કરશે.